Mynta ka sngi ki bor pyniaid District jong ka West Jaintia Hills kila ioh ban pynlong ia ka prokam ban ai jinghikai ia ki samla bad ruh ia kiba la rangbah ki ba don ka jingthrang ban ioh ia ka kam ha ki kyrdan MCS.
Ia kane ka prokram la pynlong ha District Library Auditorium, Mynthong Jowai.
Na ka liang jong u W.K. Kharlukhi EAC, ula ai ka jingbatai shaphang kumno ban pynkhreh na ka bynta ka MCS Prelims bad ka Mains. Ula batai shaphang ka jingdonkam ban don ia ka jingtip kaba iar haba pynkhreh ia ka Prelims bad dei pat ban don ka jingtip kaba jylliew bad ka jingshemphang ia ka subject haba pynkhreh pat ia ka Mains.
U pynshlur ia baroh kiba thrang ban pynleit jingmut kumno ban buh ia ka thong bad ban jop ia ki.
Na ka liang jong u Sanatan Das, Sub-Regional Employment Officer, National Career Service Centre for SC/ST, Jowai, Directorate General of Employment, Ministry of Labour and Employment, Government of India ula ai jinghikai da ka ba pyni lyngba ki dur (Powerpoint presentation) na ka bynta ka jingpynkhreh ia ka MCS Personal Interview.
Kham hashwa u bah Alexander S Mukhim, ADC ha ka jingkren pdiang jong u ula ong ba ka jingthmu jong kane ka prokram ka long ban ai mynsiem ia ki samla ban tip kumno ban pynkhreh ban iakhun ia ka Examination jong ka MCS.
Ha kane ka sngi kumba 202 ngut ki samla kila poi sha kane ka prokram bad ia ka prokram la pyniaid da ka kong D D Syngai, Additional Deputy Commissioner, Jowai.
