U ma Sniawbhalang Dhar myntri ka sorkar jylla ula wan ban pynhap pyrda iaka final football tournament ha khanduli hynnin ka sngi, kaba la pyniaid da ka Khanduli Sport Committee.
Ka jingialehkai Final ka long hapdeng ka Umjalasiaw SC pyrshah ia ka Khonsaroo SC. Ha shwa ban pynlong ia ka jingialehkai Final kala don ka jingialang kaba lyngkot ba la pyniaid da u ma B.B. Bynnud ha kaba u ma Sniawbhalang Dhar ula long u kongsan uba la pynhap pyrda artad ia kane ka Tournament. Ha kane ka sngi la iadonlang u ma Yoshida Nongspung, ma Hambertus Nongtdu CEM barim ka JHADC, u ma Bamian War Waheh Shnong ka Namdong B, u ma Sanwotki Laloo Waheh Shnong Wahiajer bad kiwei de.
Ka jingialehkai ka long kaba iakhait bha bad kaba pynhun shisha ia ki nongwan peitkai. Ha ka jingiakhun haba kut ka Umjalasiaw SC kala lah bad pynliem ia ka Khonsaroo SC da 3-2 kol. Ka kynhun kaba lahduh ka la ioh ban rah ia ka song pisa kaba T.60,000/- katba kaba wan ba ar kala ioh rah ia ka song pisa kaba T.30,000/-.
La pynshongshit ia kane ka jingialehkai da ka jingshad bad jingrwai na ki khun jong ka shnong Khanduli, ha ryngkat ka jingwan sakhi da ki nongshong shnong ka Khanduli bad kiwei de ki shnong ba marjan.
