Ka West Jaiñtia District Sports Association (WJDSA) mynta ka sngi kala iohlad biang ban pyniakhun haduh lai tylli ki Game na ka bynta jong ka jingïalehkai phutbol ba la tip kum ka “2nd U Adelbert Laloo Memorial Trophy” ha ka kyrdan 3rd Division Football Tournament 2022 ha madan Kiang Nangbah Stadium Jowai.
Ha ka jingiakhun jong ka game kaba nyngkong ka Shangpung Khliehmuchut kala pynliem ia ka Mihmyntdu da 5-0 kol. Ia kine ki kol la ioh ban thep da u Eliser Suiam uba la ioh ban thep haduh 4 kol ha ka minit kaba 20, 65, 73 bad 80+2, katba u Bantei Iakai ula ioh ban thep shikol ha ka minit kaba 53.
Ha ka jingiakhun jong ka game kaba ar ka Mawsiang FC Nongkhroh kala pynliem ia ka Khloopano da 7-0 kol. Ki nongthep kol jong ka Mawsiang FC Nongkhroh ki long u Ri-o Myrboh ula ioh ban thep haduh 3 kol ha ka minit kaba 18, 41 bad 46, u Desiderius Pyrtuh uba la ioh thep 2 kol ha ka minit kaba 14 bad 52, u Pyndapbiang Myrboh ha ka minit kaba 28 bad u Sonowel Kharsati ha ka minit kaba 68.
Ha ka jingiakhun kaba lai ka Iooksi Youth Welfare kala pynliem ia ka Nangbah Mooknor da 5-0 kol. Ki nongthep kol jong ka Iooksi Youth Welfare ki long u Tympang Tangliang uba la ioh ban thep haduh 3 kol ha ka minit kaba 14, 43 bad 62, u Pyrkhatbha Paslein ha ka minit kaba 53 bad u Wympher Tanglang ha ka minit kaba 57.