Kum shi bynta ban pyntreikam ia ka hukum jong ka ïingshari National Green Tribunal (NGT) katkum ka NGT O.A No. 172/2016 bad ruh katkum ka jingbthah ba la pynmih da i Chief Secretary jong ka sorkar jylla Meghalaya lyngba ka shithi No. FOR/CC/2/2017/915, Dt. 26/3/2022 na ka liang jong u District Magistrate ka West Jaintia Hills ula pynmih ia ka hukum katkum ka Section 144 CrPC ban ai ka jingiada ia ka Wah Myntdu.
Katkum ka hukum bala pynmih da u DM hynnin ka sngi ka long ba la khang pyrshah ia ka jingpom dieng pathar, ka jingkhlong maw bad shyiap na ki bynta jong ka Wah bad ruh na ki bynta ba marjan bad ka Wah Myntdu.
Ha kane ka hukum la khang ruh ia ka jingsait jaiñ, sait kali bad ka jingpyllang ia ki ñiut bad jakhlia ha ki rud jong ka Wah Myntdu, kumjuh ka jingpynhap ia ka khyndew na ka jingshna ia ki surok, namar kine ki wanrah ka jingpynjakhlia ia ka Wah Myntdu na kawei ka sngi sha kawei pat.
Kumta u District Magistrate ka District u Garod LSN Dykes, IAS ula pynskhem ia kane ka hukum hynnin ka sngi (04.05.2022) bad kane ka hukum kan treikam naduh bala pynmih ia ka tad haduh ban da pynmih da kum wei pat.