Ki katto katne tylli ki shnong kiba don sha ki thaiñ khappud bad ka ri Bangladesh kiba hapoh ka Sub-Division Amlarem, ki la dap da ka jinglynga kaba khraw la ar taiew kynthih mynta namar ba ki hap ban shong dum khlem don bording electric.
Kine ki shnong ki shnong kiba mad ia ka jingeh ki kynthup ia ka shnong Nongtalang, Sohkha, Lamin, Dawki, Darrang, Kudeng Thymmai ter ter. Ka jingduh bording jong kitei ki shnong ka dei namar ka jingjur palat ka jingthep jong u lapbah ha kine ki khyndiat sngi kaba la wanrah ia ka jingkhyllem jong ki post light kiba don harud surok bah Amlarem-Dawki namar ka jingtwa khyndew bad ka jingshlei um.
Nalor kata la iathuh na ka liang jong ki Line Men ka MeECl kiba dei peit ia kitei ki thaiñ ki ialeh shitom bad pyrshang katba lah ban pynbiang bording ia ki paitbah na ka por sha ka por, hynrei kim lah ban leh eiei namar ki tiar ba ki ïoh ban pyndonkam ki dei ki tiar kiba la dep pyndonkam lypa kane ka wanrah ia ka jingeh namar tang shu hap slap malu mala ka bording ka la duh.
Kane ka jingduh bording ktah shikatdei eh ia ki khynnah skul bad kiba duk ba rangli, nalor ba hap ban siew bill light man u bnai khlem da ioh ban pyndonkam, mynta pat hap ban thied sa ki bombati ban ioh jingshai. Kumta ki nongshong shnong kila kyrpat bad kyntu jur ia ka tnad MeECl ba peit ia ka thaiñ Amlarem ba kan shimkhia mardor, la pynkut ka kyrwoh na u General Secretary ka dorbar shnong Nongtalang u bah Du Myrchiang.