Mynta ka sngi da ki hajar hajar ki paidriewngeit na kylla ka Ri-Lum Khasi Jaiñtia (10.4.22) kila poi sha ka Jingïaseng Samla jong ka Khasi Jaiñtia Presbyterian (KJP) Assembly ba shiphew (X) ka ba la long ha ka Balang Presbyterian Mustem, District Mustem, Jowai Presbytery KJP Synod Mihngi, halor ka phang “Ka jingïaineh ha U Khrist” (Iannnis 15:4) kaba la sdang naduh ka 8 tarik bad kut mynta ka sngi.
Ha ki ar tylli ki Jingïaseng paidbah mynta ka sngi, ha ka por 10:30 mynstep, la ïoh ban sam ïa ka ktien u Blei na u Rev. K. Pariat bad ki jingrwai kyrpang na ki kynhun Choir kiba kynthup na ka Jingïaseng Samla Balang Thadlaboh, Jingïaseng Samla Balang Umsaw Khwan bad ka Jingïaseng Samla Balang Mairang.
Ha ka por 1:30 nohphai pat la sam ïa ka khubor da u Rev. I.W. Nongsiej ïa kaba la pynshong nongrim na ka Gospel jong u Lukas ka lyngnong ba 19 dkhot ba 28-49, kaba ïathuh shaphang ka jingleit rung u Jisu ‘kum u syiem sha ka nongbah Jerusalem hashwa ban sah narphna ïa u’.
U Pastor Nongsiej ula pynkynmaw ha ka por ba u Jisu u rung sha katei ka nongbah la pdiang sngewbha ïa u da ki paidbah ba bun ba lang kiba la siang da ki jaiñ bad ki sla dieng ha ka lynti ba u Kada u ïaid.
Kumta u Pastor u khot ïa ki paid riewngeit ba kin wan shajan jong u Trai Jisu da ka Dohnud kaba lui lui, ka jingkohnguh, ka jingsngewrit bad kiba ïaineh haduh ba kut jong ka jingshakri ïa u Nongpynim.
Ha kane ka jingïaseng la ïoh ki jingrwai na ki kynhun Choir ba kynthup ïa ka Standing Choir na ka Jingïaseng Samla Synod Sepngi, ka Standing Choir na ka Jingïaseng Samla Synod Mihngi bad la Choir na ka Jingïaseng Samla Balang Mustem.
