Mynta ka sngi ka Khasi Student Union (KSU) Jowai Circle bad ka KSU West Jaintia Hills District Unit, hapoh ka jingialam u President ka KSU Jowai Circle ha ka jingdonlang u President ka KSU West Jaintia Hills District Unit bah Laitphar Syngkrem bad ki dkhot ka seng kila leit ban khangtala syndon ia ka ophis treikam bad pynsangeh ruh shi syndon ia ka jingkhrong khajna na ki kali ha katei ka Toll Gate ne ka jaka khrong khajana jong ka National Highway Authority of India (NHAI), kaba don ha Ialong jong ka West Jaintia Hills District.
Ki nongialam ka seng haba ai jingkren sha ki lad pathai khubor ki la ong ba ka seng kala dep ban buh ia ki jingthoh ne ka jingdawa sha ka ophis treikam kane ka tnat naduh ka 23.09.2021 bad la ai por ruh haduh lai bnai ha kaban pynshna ia ki footpath ne ki jaka iaid kjat kumjuh ban pynshna ia ki bynta jong ka surok kiba sniew, ban pynbiang ia ki Street light bad kiwei de ki jingdonkam kiba kane ka jaka khrong ka dei ban leh, hynrei haduh mynta la kumba hynnriew bnai na katei ka jingai por, ki bor pyniaid jong katei ka Toll Gate jong ka NHAI kim pat shym la leh ei ei halor kitei ki jingdawa jong ka seng.
Kat haduh ka por mynmiet ruh kane ka Toll Gate kam pat ioh satia ban khrong khajna na ki kali ba iaid ba ieng namar ba ki dkhot jong ka KSU ki dang iai ap sah haduh ban da miet.
