Mynta ka sngi (12.04.2022) ka seng Meghalaya People United Front (MPUF) East Jaintia Hills District, hapoh ka jingialam u Samla K. Blah ha ka jingiadonlang u Assistant Secretary ka seng u samla Khmihbha Phawa, Vice President samla Mon Myrchiang bad kiwei ki dkhot, kila leit buh da ka jingthoh sha ka ophis jong u Commissioner of Transports, East Khasi Hills District Shillong na ka bynta ban dawa thung ia ki ophisar ban trei ia ka kam Motor Vehicle Inspector (MVI) ha ka District Transports Office, Khliehriat jong ka East Jaintia Hills District, namar kumba long mynta ym don MVI shuh ha katei ka District la kumba 6 bnai ei ei.
Ka seng mynta ka sngi kam lah ban ia kynduh ia u Commissioner namar ka jingbym don jong u ha nongbah Shilllong, kumta kala ioh ban iakynduh ia u Assistant Commissioner of Transport, East Khasi Hills District Shillong u ma R. Tariang ban ai ia kane ka dorkhas. Na ka liang jong utei u ophisar ruh u la pynpaw ba ka East Jaiñtia Hills District ka donkam shisha ban don u MVI, kumta na ka liang jong u ruh u la kular ban shim khia ia kane ka jingkyrpat bad jingdawa jong ka seng bad ban pynpoi ia kane ka memorandum jong ka seng ha u Commissioner of Transports, Meghalaya Shillong ynda ula wan na ka jingleit lynti jong u.
Na ka liang u President jong ka MPUF EJHD u bah Kyrshan Blah u la ong, ba ka jingbym don MVI ha katei ka District ka buh jingeh ia ki paidbah ka thaiñ ha ka jingiadei bad ki kam kali motor, kumjuh ruh ka buh ka jingeh ia u DTO katei ka District, u ba hap ban peit lang ia ka kam MVI ruh. Kumta na ka liang ka seng ka kyntu jur ia ka ophis treikam u Commissioner of Transports, ba kan shim khia ia kane ka kam khnang ba ki paidbah jong ka tei ka District ki lah ban pyndep ia ki kam jong ki haka jingiadei bad katei ka tnat sorkar ba donkam bha.
