Ka jingslem bad ka jingpynsahteng ia ka jingtrei ban pynpoi umdih sha ka shnong Mynksan da ka tnad PHE kumta na ka liang jong ka Khasi Students’ Union (KSU) Mynksan Unit ha ka 12/04/2022 ka la leit ban iakynduh bad u Executive Engineer ka PHE (Electrical) Division, Jowai West Jaintia Hills u ma P. Synnah ban tohkit halor kane ka jingsahteng jong ka kam.
Na ka liang ka KSU Mynksan Unit ka la pynpaw ba ia kane ka skhim pynpoi umdih sha ka shnong Mynksan la pynsahteng da ki bun bun snem. Kumba long mynta ka tnad PHE ka dang lah ban shna tang ka wei ka top um bad ki pipe um kor la lah ban pynpoi tang ha ki katto katne ki bynta jong ka shnong kaba long tang kumba shipowa na ka skhim.
Ka KSU Mynksan Unit hapoh ka jingialam u President u I. Law bad Genl. Secretary ma E. Shadap bad katto katne ngut ki dkhot kila leit iakynduh bad u Engineer ba dei peit, ha kaba u la kular ha khmat ka Seng ban shim khia noh kloi ban phah sdang trei biang ia u Contractor ba dei ban pyntrei ia ka ne ka skhim ha poh kane ka shnong.
U ma Synnah u la iathuh ruh ba ia ki top um dei ban don hynniew tylli ha kane ka shnong u la ong ruh sah sa tang ban pyndep ia kane ka kam ia ki jingdonkam la dep pynbiang lut nadong sha dong. Na ka liang ka Seng ka ban khia ia u Contactor ba la da dei ia kino kino ki jait jingtrei ruh nangne sha khmat dei ban leh kloi ban dep ki kam ym ban pynslem da ki snem nalor ba la dep pynbiang ki jingdonkam baroh na ka Ophis.