U Dr. H Carehome Pakyntein uba dei u nongaidawai kynbat Khasi na nongbah Jowai ula ioh iashim bynta lang ha ka jingialangbah jong ka Global Ayush Investment & Innovation Summit 2022 kaba la pynlong ha nongbah Gandhinagar jong ka jylla Gujarat naduh ka 20 haduh 22 tarik mynta u bnai.
Haba iakren bad u Dr. Pakyntein lyngba ka telephone mynta ka miet ula iathuh ba ka jingiohlad ban iashim bynta ha kum kane ka jingialang bah ka long ka jingplie lad plie lynti ia kiba bun ki nongaidawai kynbat kiba don hapoh ka ri India bad kiba nabar ruh. Ula iathuh ba na ka liang jong u Myntri Rangbahduh ka ri India u Narendra Modi ruh ula kyntu ia kiba bun ba lang ba kin phai khmat sha kum kine ki jait dawai namar ba ki long kiba bha na ka bynta ka koit ka khia jong ki briew.
U Dr. Pakyntein u kyrmen ba ka jingangnud jong ka sorkar India ban kyntiew ia kane ka rukom ai dawai kan long ka jingkyrkhu ym tang ia ki nongai dawai kynbat hynrei khamtam eh ia kiba pang ba shitom ha ki por ban sawan. Na ka liang jong u ula pynpaw ruh ka jingsngewnguh ia ka sorkar jylla kaba la ai bynta ia u ban iadon bynta ha katei ka jingialangbah.
Ka jylla Meghalaya lyngba ka Planning Department kala ioh ban phah 6 ngut kiba la leit iashim bynta ha katei ka jingialangbah, kiba kynthup ia ki 3 ngut ki nongai dawai kynbat, uwei na West Khasi Hills, uwei Ri-Bhoi bad u ma Pakyntein na West Jaintia Hills, ki don ruh ar ngut ki Scientist na ka Bio Resources Development Centre (BRDC), Meghalaya Shillong ba kynthup ia i kong Dr.Jennie P Lyngdoh bad u bah T. Niangjuh kiba dei ki Senior Scientist ka BRDC ryngkat u Secretary ka Planning Department ka sorkar jylla.
Ha katei ka jingialangbah la wan ban iadon bynta ruh da u Dr Tedros Adhanom Ghebreyesus uba dei u Director General jong ka WHO.
