Ka seng Hynniewtrep Achick National Movement (HANM) ka la nangpyniar bad pynkhlain shuh shuh ia ki tnat treikam jong ka khamtam ha ki thaiñ khappud jong ka jylla na ka bynta ban iada ia la u pud u sam bad ka khyndew ka shyiap jong ka ri.
Mynta ka sngi ka seng HANM kala ioh ban pynkha ia ka HANM Syndai Unit, ha ka jingiadonlang u President ka HANM EJHD, u samla Comingsoon Dkhar. Haba ai jingkren ula ong ba ka jylla Meghalaya ka shah kyntur pud ym tang ha ka jylla Assam hynrei wat ha ka Ri Bangladesh ruh, kumta u kyntu ia ki dkhot jong kane ka Unit ba thymmai kaba don ha ki thaiñ khappud bad ka ri Bangladesh ba kin long kiba trei naduh ka mynsiem ban iada ia ka ri bad ka jait bynriew ban nym ai lad ia kiwei pat ki jait bynriew ba kin ioh ban wan iuh roit ha kane ka ri jong ngi.
Mynta ka sngi ia ka jingialang la pynlong ha Amlarem, War Jaintia bad ia ka jingpyntian smai ia ki dkhot jong ka HANM Syndai Unit la ioh na u President HANM War Jaintia Circle, u bah Wanbiang Lakuna bad la ioh ruh ia ki jingkren na u General Secretary HANM WJHD u samla Wankishwa Mawlong, u ba la ong kumba ka seng ka ieng ha ka nongrim ban iada ia u pud u sam bad ka khyndew ka shyiap jong ka ri bad ka jait bynriew kumta haduh mynta hi ka seng ka ieng skhem ha kane ka nongrim ban iada ia u pud u sam jong ka jait bynriew. Na ka liang jong u, u la ai ruh ki kyntien sneng kyntien kraw ia ki dkhot jong ka HANM Syndai Unit.
Ki nongkitkam ka HANM Syndai Unit ki kynthup ia u President bah Ronaldo Syndai, Vice President Synta Pohleng, General Secretary Junom Syndai lem ba kiwei de ki nongkit kam bad ki dkhot ka seng.