Hadien ar snem ka jingduhlad ban pynlong ia ka jinglehkmen Shad Sukra na ka daw jong ka jinglynshop ka khlam Covid-19 mynta ka kynti sha shisien pat da ki hajar ki khun ka Seiñ Raij Jowai hynne ka sngi ki la mih sha ki bynta jong ka Iawmusiang ban pynlong ïa jinglehkmen Shad Sukra ba shisien shisnem kaba la juh pynlong hashwa ba ki khun ki hajar kin hiar ban rep sha ki hali ki pynthor ban bet ia u symbai u kba ryngkat ka jingkyrmen ba un long uba siesoh bad ban dap ban biang ka bam ka sa.
Ka phang jong kane ka shad Sukra mynta u snem ka ong “Samoi wa kylla wa pynchoh iei por, Iewa da ioh u tip u niawkor ” ba la pynïaid da ka Arts & Culture Committee jong ka Seiñ Raij Jowai. U Chief Justice ka Meghalaya High Court u Justice Sanjib Banerji u lawan ban sakhi lang kum u Kongsan ia kane ka jinglehkmen Shad Sukra ka Sein Raij Jowai.
La sdang ia kane ka Shad Sukra naduh hynnin ka sngi jong ka 23.04.202, ha la ki jong ki jong ki dong da kaba pynlong ïa ka jinglehkai drama bad mynta ka sngi 24.04.2022, kaba dei ka sngi kut pat kaba dei ruh ka sngi mih ïew, naduh ki longkmie ki longkpa, ki khun samla bad ki hep kiba rit ki la mih ryngkat ki riam ki biet tynrai. Kane ka Shad Sukra ka long kum ka por ban ai bam ai dih, kaba bsa ba pjah ïa u khun bynriew lyngba ka jingdon jingem ha ka mei mariang kaba pyndap pynbiang ha baroh ki saw aiom bad lyngba kane ka shad sukra la khmih lynti ba kan wanrah ruh ïa ka jingïaieit, ka jingïatylli para nongshong shnong.
Ha Madan mynkoi LoompydiIïongpiah Jowai la sdang ia ka Shad Sukra ha ka por 10 baje, ha kaba u ma Kyrmen Shylla uba long ruh u myntri ka tnat Social Welfare ula long u kongsan, ha kaba la ioh ruh ia ka jingkren pdiang shewbha na u ma H. Pasah Vice President A&G SRJ, ka jingnguh Blei da u ma H. Challam, jingkren halor ka Chad Sukra da u Doloi ka Elaka Jowai u ma Puramon Kynjing bad ka jingkren na u ma W. Kharbukhi Joint Secretary Arts & Culture Seinraij Jowai. La ioh ia ka jingshad tynrai na ki kynhun bapher bapher jong ka Seinraij.
Ha Iawmusiang pat la sdang ha ka por 3 baje noh phai sngi, ha kaba la ioh ia ka jingkren na u Kongsan uba dei u Chief Justice ka High Court jong ka jylla Meghlaya u Justice Sanjib Banerji, uba la pynpaw ka jingiaroh ia ka Sein Raij Jowai, kaba danglah ban pynneh ia kane ka Dustur ka riti kaba donkam naduh ki por barim bajah. La ioh ruh ka jingkren ba u President ka SRJ u ma O.R. Challam, u la ai khublei kyrpang ia u kongsan bad kitbok kit rwiang ia baroh ki khun jong ka Sein Raij bad kiwei de ba kin nangioh ia ka jingkoit jingkhia krad.
Kiba iashim bynta ha jingshad bad rwai tynrai ki kynhup is ka WWO-SRJ, Shlem ki Sur Tynre Shangpung, Lumiongkjam, Sein Tylli Lang, Seinraij Shillong, Chilliangraij, Iongpiah, Tpep-Pale, Lumkyrwing, Umchiangiar, Dulong, Seinraij Ummulong, Panaliar bad kiwei de.
