Mynta ka sngi u MLA jong ka Shangpung u ma Comingone Ymbon ula ioh ban pyllait ia ka song jingiarap sha ki 175 tylli ki nongrep kiba don hapoh ki Producer Group jong ka Laskein C&RD Block kala kot haduh Rs.1.18 klur tyngka.
Ia kane ka jingiarap la pynioh sha kitei ki Group ha ka jingialang kaba la pynlong ha Madan Moosyiem, ha shnong Shangpung, ha kaba ia ka jingialang la pynbit pynbiang da ka Meghalaya Basin Management Agency (MBMA).
Haba ai jingkren kum u kongsan u ma Comingone ula kyntu jur ia ki nongrep ba kin pyndonkam hok ia ka jingiarap kaba la pynioh ha ki lyngba ka sorkar. Ula ong ba ka sorkar jylla lyngba ka skhim FOCUS kala trei shitom ban kyntiew ia ki nongrep hapoh ka jylla.
Ula iaroh ruh ia ka jingnoh synniang jong ki Self Help Group ha ka imlang ka sahlang kaba la iarap ban kyntiew ia ka ioh ka kot ha ki shnong nongkyndong.
U ma Ymbon ula pynpaw ruh ia ka jingbynniaw halor ka jingbym iohlad ka sorkar ban bret ia ki jakhlia na ka daw ka jingiai pyrshah jong ki katto kattne ki briew. Kumta u khot ia ki paidbah ban don ka jingiatreilang bad ka sorkar ha kino kino ki bynta khnang ban lah ban wanrah ia ka jingbha jingmiat hapoh ki shnong ki thaw bad ha ka District hi baroh kawei.
La ioh ruh ka jingkren na u Dr. D.I. Kjam uba dei u District Officer A.H & Veterinary, Jowai ha kaba ula kyntu ia baroh ki nongrep ba kin shim kabu na kine ki skhim kiba la pynioh da ka sorkar bad ban pyntrei hok ia ki, khnang ba kin lah ban ieng ha la ki jong ki kjat. Ula ong ruh ba ka sorkar lyngba ka tnad A.H & Veterinary ruh ka don ki skhim kiba ai ka jingmyntoi ia ki nongri mrad.
Kiwei de kiba ai jingkren ki kynthup ia ka kong D.D Syngai, Additional Deputy Commissioner kaba long ruh ka DPO jong ka Planning Branch, Jowai bad u Sywell Lyngdoh District Project Manager, District Basin Development Unit, Jowai.
