Ka HANM Jaintia zone ka pynpaw ia ka jingthrang ban don ka jingiatrei lang hapdeng ki paitbah ki briew sorkar bad ki seng bhalang bapher bapher khnang ba yn lah ban wanrah ia ka jingkhuid jingsuba jong ka shnong Jowai kaba dei ka shnong kaba paw bad ba konsan tam ha ri Lum Jaintia. Ha ka juh ka por ka kyntu lang ia baroh ban wad ia ki lad ki lynti kumno ban weng ia ki jakhlia ki jaboh jabaiñ ki ba don ha ki bynta jong u Surok Iawmusiang.
Ka HANM Jaintia Zone lyngba u Working President bah Pynshngain Papang ka buh ka jingkyrpad ia ki paitbah nongshong shnong ka ri lum Jaintia ba kin sngewbha ban ailad ia ka Jowai Municipal Board ba kan ioh ban leit theh ne bret noh ia ki ñiut sha ka thliew dewiong kaba shu ieh sah lyng krang ka ba la ai sngew bha da u ma Damewanhi Rymbai kaba ula ai sngewbha ban long kum ka jaka bret ba shipor. Ka seng ka pynpaw ba kine ki krem dewiong ki ba shu sah lyngkrang ki buh jingma ia u paitbah nongshong shnong u ba iaid ba ieng na rud ka tei ka krem, kumta la da lah ban pyndap ne tep noh ia ki kan long ka jingmyntoi ia ki nongshong shnong hi, nalor kata kan iada ruh na ka jingtwa ne kyllem jong ka khyndew lada jia kino kino ki jinglyngshop ki bor mariang, khamtam laba khih u jumai.
Ka seng ka kyrpad ia ki paitbah, ki sengbhalang bad ki briew sorkar ban pyni ia ki lad ki lynti ym ban kut tang ha ki jing pyrshah, ka bym wan rah shano shano ruh ia ka jingbha ne ka jingmyntoi ki nongshong shnong. Kum ka seng ka kyrpad ia ka sorkar ban wad ia ki lad ki lynti ban buh noh ia ka Recycle Plan ha ka thaiñ khnang ban pynduna ia ki jaboh plastic bad ban long ka jingmyntoi ia u paitbah ka rilum Jaintia baroh kawei.