Katba nangmih ki sngi ki kynthei kila nangkiew ha kiba bun ki liang bad kane kala paw bha ha ka jingai jinghikai kyrpang ïa ki kynthei kiba ha ka shnong Sabahmuswang ïa kaba la pynlong da ka Society for Urban and Rural Empowerment (SURE), ha ka 30 tarik u Ïaïong. Ïa kane ka jingai jinghikai la pynlong ha ka ïngskul Hynniaw Thyndai Memorial LP School SSA, Sabahmuswang kaba don ha ka surok ban leit sha shnong Nangbah.
La ioh nyngkong ia ka jingkrenn lamkhmat da u Dr. H.H.Mohrmen uba la ong ba u sngewkmen ba ki kynthei jong kane ka shnong kila wan shakhmat ban shim ïa kane ka training kaba lah ban ïarap ïa ki ba kin nang ïoh jingmyntoi khambun ha ka kamai kajih jong ki. Ula lamkhmat ruh ba kane ka training ka dei kyrpang naka bynta ban ai jinghikai ïa ki kynthei ïa kaba la bei pisa da ka Ophis jong ka District Social Welfare Officer West Jaintia Hills, Jowai. Ka jinghikai kaba kongsan ha kane ka kynti ka long ha ka kam shna sboh na ki mar ki mata kiba don hapoh la ki shnong ki thaw hi.
Ha ka jingïalang plie ïa kane ka training ïa kaba la pynïaid da u Habandajop Lyngdoh u Master Trainer jong ka SURE, ka kong Hat Dkhar kaba long ka President jong ka Village Organisation ha ka shnong Sabahmuswang kala pynpaw ïa ka jingsngewkmen ban ïoh ïa kiba kum kine ki training. Haka jingkren pdiang sngewbha jong ka, ka kong Hat ka kyrmen ba ki para dkhot jong ki SHG kiba hap hapoh ka VO kin shimkhia ïa ka jinghikai kaba kila ïoh bad kin pyndonkam hok ruh ïa ki.
Ha kane ka sngi u Habandajop Lyngdoh ula ai jinghikai ïa ki kynthei ha kane ka shnong ha kaba ïa dei bad ka lad shna sboh wieh ïa kaba ki khot ka Vermi Composting. Nalor kata la ai jinghikai ruh kumno ban shna sboh na ka eit sniang ne eit syiar da ka rukom kaba ki khot ka Bokashi. Namar ha ka rukom shna sboh da ka Bokashi donkam ruh ïa ki dawai shna hi kum ka Lacto Acid Bacteria (LAB) bad u Indigenous Micro Organism (IMO), kumta la hikai ruh ïa ki nongwan shah hikai kumno ba kin nang ban shna hi ïa kine ki dawai. Ïa kine ki dawai ki lah ban shna na ki mar ki mata kiba don hi ha ki ïng ki sem jong ki bad kiba ïoh na ka mariang.
U Dr. Mohrmen ula ong ruh ba haka jingtrei kam jong ki, ki lap ba kiba bun ki nongri sniang ki ud ba ka kam ri sniang kam phuida satia (not cost effective) na ka daw ba ka rem palat ka jingbam sniang (concentrated feed). Kane ka jia ruh namar ba kiba bun hi ki nongri sniang ki shu ri mylleñ uwei ne artylli ki sniang. Na kane ka daw ka seng kala ai jinghikai ruh ïa ki nongrep kumno ban shna jingbam sniang da kaba pyndonkam da ka Bokashi method. Kane ka rukom shna jingbam sniang ruh ka long da kaba pyndonkam da ki jingbam kiba ngim donkam shuh bad da kaba khleh lang ïa ka LAC bad u IMO.
U Habandajop Lyngdoh uba la dep ïa ki training kiba bun bad uba long ruh u nongri sniang uba don ym duna ïa ki arphew tylli ki sniang ula ong ka Bokashi method ka dei kaba ngi shu pdem ïa ki jingbam ban ïoh ai bam ïa ki sniang. Ki nongri sniang ki lah ban buh ïa kane ka jingbam bala pdem haduh hynriew bnai. Ula ong ruh ba ka jingmyntoi jong kane ka rukom pdem bam sniang ka long ba ki nongrep kila ïoh kham bun ka por bad lait lut pisa ban thied dieng namar ba kim hap shet shuh ïa ka jingbam sniang jong ki. Ha ka jingkren ai khublei jong ka kong Dakani Phawa kaba long ka Secretary ka Village Organisation Sabahmuswang kala ong ba kane ka dei ka sien kaba nyngkong ba kila ïoh kaba kum kane ka jingai jinghikai bad ba ki nongwan shah hikai kila ïoh jingmyntoi shikatdei eh na kane ka training. Ka Iebha Kyndait kaba long ka nongïalam jong kawei ka SHG kala ong ba kiba bun hi ki kynthei ki sngewkwah ban sdang ban shna ïa ka LAB bad u IMO bad kumjuh ruh ïa ka kam pynmih sboh wieh.
