Kum ka jingkynmaw burom ia ka Northeast Festival 2022 bad kum shi bynta na ka jingrakhe ia ka Azadi ka Amrit Mahotsav ne ka jingiohlaidluid ka ri India ka ophis jong u BDO, Wapung C&RD mynta ka sngi kala pynlong ia ka Self Help Group (SHG) Mela cum Financial Literacy Camp ha madan ialehkai jong ka shnong Wapung Skur, East Jaintia Hills District.
Ha kane ka prokram la wan ban iadon bynta da u DC ka East Jaintia u A.Baranwal IAS, kum u kongsan ha ka jingiadon ryngkat Dr. T. Shylla, BDO, Wapung C&RD Block, Dr. R. Pyrtuh, BDO Saipung, u T. Kyndiah District Chilf Protection Officer bad kiwei de ki heh sorkar.
U Baranwal haba ai jingkren ula ong ba ki SHG ki long ki bynta kiba donkam bha namar lyngba jong ki lah ban pynduh ia ka jingduk jingkyrduh jong ki nongshong shnong. Kaba kongsan ruh ka long ba lyngba ki SHG ka pynkup bor ia ki kynthei kiba dei ki nonglam lynti ha ki bynta bapher bapher hapoh ka jylla. Ula kular ban thaw ki lad ki lynti ban pynpaw sha ka pyrthei ia ki SHG bad ruh ban pyniaid iew ia ki mar ba ki pynmih namar ba kidei kiba biang bha ha ka iew ka hat.
Na ka liang u Dr. T. Shylla BDO Wapung ula iathuh ba kane ka Block ka don haduh 1710 tylli ki SHG bad ki don kumba 17,000 ngut ki dkhot, nalor ki 102 tylli ki Village Organization (VOs) kiba trei ha ki kam bapher bapher kum ka ri sniang, ri syiar, ri masi, rep jhur, rep soh bad kiwei de ki rukom trei.
La ioh ruh ia ka jingai jinghikai na u Reading War, Advocate, uba la ai jingkrehn halor shibun ki phang kiba iadei bad ki kam aiñ.
Ha kane ka prokram kala don ka jingai ram sha ki 8 tylli ki SHG kaba kot sha ka T.12 lak tyngka na ki Banks kiba pher bapher. Napdeng kine kila don ar tylli ki loan ba la pynioh da ka Meghalaya Rural Bank, Wapung Branch la pynioh sha ki ar tylli ki SHG kata ka Iatyllilang SHG na Pamra Paithlu bad ka Laibaitshaphrang SHG na Wapung Skur kiba la ioh mar 2 lak tyngka bala sam da u DC.
Ha kane ka Mela la wan rah pyninam ia ki syntiew ba bun jait, ki jait jingbam bapher, ki jhur, ki soh, ki jingthaiñ da u thri, ka jingthaiñ jaiñ bad kiwei kiwei da ki SHG bapher bapher. Na ka liang ki tnad sorkar ruh kila wan ban iashim bynta lang ha kane ka Mela kum na ka tnad Fisheries, Labour, ophis Bloc, ka District Legal Services Authority, ka Agriculture, Horticultre bad ruh ka MR Bank na ka bynta ban iarap plie account ia ki SHG.
Kala don ruh ka jingiakop shad bala iashim bynta da ki SHG bad la sam ia ki khusnam sha baroh ki nongjop.
