Mynta ka sngi ka Sarot I Man, kawei na ki seng treimon sngewbha ha nongbah Jowai, ka la pynlong ia ka prokram pynkup burom ia ki nongthoh khubor jong ka ri Lum Jaiñtia kiba don hapoh ka shatri jong ka Jaintia Journalist Association (JJA). Ia kane ka jingpynkup burom la pynlong ha Yadalada Villa, Kdohhati Dulong Jowai.
Hashwa ban pynkup burom ia ki dkhot jong ka JJA la don ka jingialang kaba lyngkot kaba la pyniaid da u ma Kyllimot Lhuid dkhot SIM bad ia ka jingnguh Blei la ioh na u ma Barlle Moore Shilla dkhot SIM bad ia ki kyntien ai khublei la ai da u ma Wombai Sumer.
Ki nongthoh khubor kiba la poi sha kane ka jingshah pynkup burom mynta ka sngi ki kynthup ia u Russel Nongrum, Ialambha Dhar, Bantei Dhar, Ruhi Phawa, Sajeki Passah, Larry Patwet, Soolangki Laloo, ka Sniawbha Pohthmi, Ribha Shadap bad ka Rinibeth Patlong.
La ioh ia ki jingkren na u President ka Sarot I Man u ma Riquoma Rq. Laloo, uba la ong ba ia kane ka seng la sdang ia ka ha ka 25 tari u December, 2020, bad kane ka seng ka dei kaba trei na ka bynta ban iarap kylliang bad ai kylliang ia kiwei khamtam kiba don ha ka khim ka khait katba lah ka bor, u la ong ruh ba ka Sarot I Man ka la juh pynlong ruh ki program syniang snam ha kine ki por ba la dep. U la ai ruh ka jingiaroh bad kyrkhu kyrdoh ia baroh ki dkhot jong ka JJA ba kin nangtrei ia kam, kaba dei kawei na ki kam ban shakri iaki paidbah hapoh ka ri. U la ong ba ka seng kala pynlong ia kane ka sngi pynkup burom ia ki nongthoh khubor ka long ruh kum ka jingkynmaw ia sngi kaba la tip kum ka World Press Freedom Day.
Na ka liang ka JJA la ioh ia ki jingkren na u General Secretary u ma Russel Nongrum, u la ai khublei kyrpang ia baroh ki dkhot ka Sarot I Man kaba la kynmaw ia ki nongthoh khubor jong ka Ri Lum Jaintia. U la ong kum ki nongthoh khubor ngi don shibun ki jingeh la ha ka jingtrei ne ka jingioh nalor kiwei de ki jingeh, u la ong kumba long mynta ki nongthoh khubor ha ri Lum Jaintia ki long shisha kiba iaishah bad ki trei hok ia kam. Na ka liang jong u, u la kitbok kit rwiang ia kane ka seng ba kan nangiai leh ia ki kam ba bha ki jong ka na kawei ka por sha kawei pat.
