Ka Hynñiewtrep National People Federation (HNPF) West Jaiñtia Hills lyngba ka kyrwoh na u President ma R.N. Suchiang, la ong ba ka seng hadien ka jingïalang pyrkhatkam mynta ka sngi ka la rai ban ai ka jingkyrshan ba pura ïa ka jingdawa jong ka Synjuk Ki Waheh Shnong Ri Jaiñtia ban pynsangeh ïa ka jingpyndait Smart Meter hapoh ka Ri-Lum Jaiñtia.
Ka seng ka la kynnoh ba kane ka jingthmu jong ka sorkar ban pyndait ïa ki smart meter kam long satia kaba pynmyntoi ïa ki paidbah nongshong shnong ka jylla, la kynnoh ruh ba kane ka jingleh jong ka sorkar ka long kaba bakla namar ka sorkar ka khlem da ai jingtip shwa sha ki paidbah nongshong shnong.
La pynsngew ba kane ka jingthmu pyndait smart meter khlem ka jingpynshai bniah shaphang ka rukom treikam jong u meter kala buh shuh shuh ha ka jinglyngngoh ïa kiba bun ba lang.
U ma Suchiang ula ong kumba long mynta kiba bun ki shnong hapoh Ri-Lum Jaiñtia kila duh ïa ka bording tang namar ka jingbym treikam jong ki Transformer bad kane ka long ka jingduhnong kaba khraw ïa ki paidbah lada pyndait sa ïa ki smart meter.
Halor kane u ma Suchiang ula ong ‘lada ka sorkar kam sngap ïa ka jingdawa ka Synjuk Waheh Shnong Ri Jaiñtia ban pynsangeh ïa katei ka jingthmu pyndait Smart Meter’ na ka liang ka seng kam ban se ban leh ïa kaba donkam.
