Ka long ka sien kaba nyngkong eh ia ka District ha kaba lah ban plie ia ka “ Bal Vidyalaya” (Pre Primary School) ha shnong Mukhla, West Jaintia Hills District ha ka 11.5.2022, ka school kaba dei ia ki khynnah rit kiba don ia ka rta kaba 3 haduh 6 snem. Ia kane lah wan ban plie da u MLA ka thaiñ u ma Wailadmiki Shylla.
Kham hashwa la don ka jingialang kaba pyniaid da u ma Ryngkat Sari u ba lah ai ki kyntein pdiang burom ia ki paidbah kiba wan sakhi ia kane ka jingplie ia ka school. U ma Wailadmii Shylla u la long kum u kongsan ha kane ka sngi.
Lah ioh jingkren lamkhmat na i trai jong kane ka skul i Kong Rosemi Sari i ba la ong ba ka jingwan kane ka skul ha shnong Mukhla kan long ka jingkyrkhu bad ka jingmyntoi ia ki khynnah rit namar ka jinghikai ka pher na kiwei pat ki rukom hikai. Ka la ioh ia ki training bad certificate bad ka sngewthuh ba ka long kaba pher ka rukom hikai kaba kloi ban pynsngewthuh bad pynsgewtynnad ia ki khynnah rit ha ka ban pule. Ka rukom hikai kadei katkum ka juk ka ba mynta ka “Digital Learning” kaba pyndonkam da ki kor computer, Tablet bad internet. Ka la iaroh shibun eh ia ka CSC (Common Services Centres) e- Governance ka Office kaba ialam lynti ia ka ban wanrah ia kane ka skul ha shnong.
La ioh jingkren ruh na u ma Marda Oo Myrchiang, District Manager CSC e Governance-SPV, West Jaintia Hills District u ba lah batai ia ka jingtreikam ki CSC ha District. U la ong ba nalor ka jingdon kane ka skul sa kiwei pat ki jingiarap bad ki jingmyntoi ki paidbah kin ioh lyngba ka CSC kaba pyniaid da ka trai jong kane ka skul. Da ka jingdon ki CSC ha ki shnong ka iarap bha shibun ia ki briew ha kaba ki briew kim da donkam shuh ban leit sha sor lane sha ki Office sorkar ban ioh jingiarap katkum ka jingdonkam jong ki. Kumba ka pyrthei hi mynta ba bun na ki kam lah pyniaid online te ka CSC kadei kawei na ki iing shakri paidbah kaba lah ban leh ia kiei kiei ki kam ki ba dei online lane Offline. U lah ong shuh shuh ba ki CSC mynta ki lah long kum ki Bank, ki Education centre, ki Insurance service provider, ki jaka die ia ki symbai, sboh bad kiwei kiwei de ki kam. Ki briew ki lah ban wan sha ki CSC ban ioh ia kine ki jingdonkam. U lah kyntiew ia ki trai shnong ba kin pyndonkam shisha ia kane ka CSC khnang ba ka jingmyntoi kan long ia ka shnong hi baroh kawei. Hashuwa ban pynkut ia ka jingkren u lah ong ba don ki free computer course training ia ki khynnah skul, ki samla, ki longkmie, ki rangbah kiba lah ban wan pynrung kyrteng na kane ka CSC.
U kongsan u MLA ma Wailadmiki Shylla ha kane ka sngi u lah kren bad iaroh ia ka trai jong kane ka skul. U la ong ba ka long ka khynthei kaba iaishah kaba wad ki lad ban pyntbit ialade bad ban pyndonkam ia kata ka jintbit jong ka ha ka shnong. Kum ban wanrah ia kane ka pre-skul ha shnong kadei da ka jingtrei shitom bad ka jing wad lad ka jong ka, u lah ong. U la kyrpad ia ki longkmie ki longkpa ba kin phah ia ki khun jongki sha kane ka skul khnang ban ioh ia kata ka jinghikai kaba bha katkum ka juk mynta. Namar u ong ki khynnah kiba don ia ka rta 3 haduh 6 snem ka jabieng jong ki ka dang long kaba lung te lada ngi hikai ia ki ia kaba sniew ki kloi ban tip ia kaba sniew te lada ngi hikai pat ia ki ia kaba bha ki kloi ban tip ia kaba bha. Dei na kata ka daw ba ha kane ka skul ki la don lypa kata ka system ban hikai katkum ka bor jong ki khynnah. U la ong ruh ba mynta bun ki briew kiba wan sha u ban kyrpad pynioh kam sorkar hynrei ka kam sorkar mynta ka la long shitom ban ioh, ka la kut, ki post kiba khyndiat ki nong apply da ki hajar ngut. Na kata ka daw u lah kyntiew ia ki khun samla kidei ban pyntbit ialade bad wad ki lad ki lynti khnang ban ioh seng kam lajong. U pynkut ia ka jingkren da kaba u ong un ialeh shitom ban iarap kat ba lah katkum ka jingdonkam kane ka skul ha ki sngi ban wan.
U bah Comfort Rympei Assistant Manager CSC-SPV, Meghalaya ha ka jingkren jong u, u la ong ba ka jingdon kane ka skul ha ka shnong kaba dei ia ka klas Nursery,KG bad UKG ka long ka jinghikai ka ba thymmai ia ki kynnah rit ban pynproh ia ka jabieng namar kadei ka jinghikai kaba ymdei shu pule ia ki kot hynrei da kaba ialeh kai bad kiwei kiwei ki jinghikai kakum ka juk mynta ka “Digital learning” kaba ki khynnah ki kloi ban sngewthuh. U lah ong shuh shuh ba ka Education ka jingnang ka jingstad ka duna bha ha ka jylla jong Meghalaya lada ia nujor bad kiwei pat ki jylla namar ka technonglogy ka stet bha mynta te lada ym iabeh katkum ka technology kaba mynta te yn long kiba sahdein. Dei na kata ka daw u lah kyrpad ia ki longkmie ba kin phah ia ki khun rit jong ki sha kane ka skul khhang ban kin ioh ia kata ka jinghikai (foundation) katkum ka technology kaba mynta. Kane kadei ka jingsdang, ngi khmih lynti ban wanrah shuh shuh ki training ba bun jait ki vocational training, ki skill training bad kiwei kiwei katkum ka jingdonkam ka shnong ula ong shuh shuh.
Kiwei de ki Nongkren ki khynthup ia ka Kong Ameecia Pariat DM CSC-SPV, West Jaintia Hills District, ma Buhlut Suna, Rangbah shnong Mukhla Nongrim bad u ma Nang Oo Chwa Sari.
Lah pynwai ia kane ka jingialang da kaba kitbok kitrwiang ia ka Miss Rosemi Sari ba kan pyntrei kam bha ia kane ka skul bad ot ia u ribbon da u kongsan.
