Ka District Level Inter School Athletic Meet kala sdang mynta ka sngi ha Kiang Nangbah Stadium, Dongmihsngi, Jowai wat hadpen ka jingpynthut ka mariang na ka jinghap jong u slap. U P.K. Boro uba dei u ADC, West Jaintia Hills District ula wan ban plie pyrda ia ka kum u kongsan, ha ka jingiadon ryngkat ka District School Education Officer kong P. Syiem, u District Sports officer ma K. Passah, ki dkhot ka West Jaintia District Sport Association ba ki nonghikai na ki skul bapher bapher.
Haba kren kum u kongsan u Boro ula pynshlur ia ki nongiashim bynta ban don ia ka mynsiem ialehkai bad ka mynsiem jingiakhun bad ban leh ia kaba bha tam ka jinglah jong ki. Ula ai ruh ka jingkyrkhu kyrdoh ia baroh ki nongialehkai bad ula pynher ruh ia ka lama kum ka dak jong ka jingsdang ia ka lympung bad kala don ruh ka jingbamsmai da ki nongiashim bynta.
Kumba 17 tylli ki skul kila wan ban iashim bynta ha ki jingiakhun bapher bapher kiba kynthup ia ka 100mtr, 400 mtr, 600mtr, 1500mtr, 4×100 mtr, High Jump, Long Jump, Discus throw, Javelin throw bad ka shot put ha kine ki 3 sngi lynter kata naduh ka 11-13 tarik mynta u bnai.
Ia kane ka lympung la pynbit bad pyniaid da ka ophis jong u District Sports Officer, Jowai ha ryngkat ka jingiatreilang ka West Jaintia District Sport Association.
