Ka wah Myntdu ka la dap miar bad shlei jur na ka jinglynshop jur jong u lapbah kaba la sdang naduh ka shiteng synñia bad bteng haduh ka shiteng sngi (13/5/2022).
Ka Myntdu kala tap lut ia baroh ki hali pynthor naduh na Pynthor Neiñ ter ter shaduh sha Pynthor Wah bad shaduh ki bynta jong ka shnong Ialong ruh. La sakhi ruh ia ka jingshah tap jong ki surok ha ki bynta jong ka Syntu Ksiar.
Mynta ka sngi na ka daw jong u lapbah kala wanrah ruh ka jingtwa khyndew kaba bun ha ki bynta jong ka nongbah Jowai, kum ha Mynthong ha ki bynta jong ka skull QC Springsite, ha Caroline Colony bad ruh ha Riatsasim kaba la wanrah ia ka jingrung jong ka khyndew sha ki ïing briew.
Kawei na ki tnad jong ka wah Myntdu kata ka wah Rymphum kaba don ha ki bynta jong ka shnong Mookyrdup kane ruh ka la shlei miar bad kyntur shaduh ki bynta jong ki ïing briew ba don ha rud jong ka.
