U Chairman ba thymmai jong ka Jowai Municipal Board (JMB) ma Lasooki D. Lakiang, mynta ka sngi ula khot ia ka jingialang jong ki katto katne ki sengtreimon sngewbha kiban ai ka jingiatreilang bad ka Board ban pynsngewthuh ia ki paid nongshong shnong kumno ban tip ban pyniakhlad ia ki ñiut kiba pyut bad ki ñiut ki bym pyut, kaba dei kawei na ki jingthrang jong u ban pynduna ia ka jingpynmih ñiut hapoh ka nongbah Jowai.
“Ynda ki briew kin sngewthuh ban pyniakhlad ia kine ki jakhlia ne ki ñiut kan iarap shibun ban pynduna ka jingpynmih ia ki jakhlia kiba hap ban leit bret da ka tnad Municipal, nalor ba kane ka tnad ka don hapdeng ka jingduna jong ki nongtrei”, ong u ma Lakiang.
U ma Lakiang ula ong ruh ba na ka liang jong ka JMB kan sa khot jingialang ruh ia ka Synjuk ki Waheh Shnong ba don ha nongbah Jowai ban iakren sani bha halorkane ka kam.
Ha kane ka sngi kila don ki nongialam sengtreimon sngewbha kiba kynthup ia u President jong ka SURE u Dr. H.H. Mohrmen bad u Secretary ka Young Minds Collective (YMC). Na ka liang kine ki nongialam kila kloi ban ai ka jingiatreilang bad ka JMB ban ai ka jingpynsngewthuh sha ki paidbah ba kin tip kumno ban pyniakhlad ia kitei ki jait ñiut.
Na ka liang u Dr. H.H. Mohrmen, u la ong kane ka jingpyniakhlad ia ki ñiut ka dei ban long naduh na ki ïing ki sem, namar u la ong ba ka Solid Waste Management Rule 2016 kala kren shai ba ka jingpyniakhlad ia ki ñiut na la ki iing ki sem ka dei kyllum lang ia baroh, u la ong ruh ba ia ki ñiut kiba lah ban pyut ne ki Biodegradable lah ban pynkylla sha ki sboh bapher bapher na ka bynta ka jingdonkam jong ki nongrep, katba ia kito ki ñiut ki bym pyut kum ki kynja plastic ne ki non-Biodegradable, ka la ong shai ba ka dei ka kam ram kino kino ki karkhana ne ki Industrial Unit kiba jan tam ki dei ban shim ia kine ki niut bym pyut na ka bynta ban pyniaid kam ia ki da kaba pynkylla ia ki kum ia ki kynja umphniang bad kiwei de.
U samla Chenmiki Laloo ruh u la ong kum ka seng jong ki samla ba thymmai kaba peit ia ka eh ka shon jong ki paidbah nongshong shnong, ka la dep ban pynlong ia ki katto kato ki jingiamir jingmut ha kaba kumno ban lah ban ia khun pyrshang bad ki ñiut. Kala don ka jingpyrshang kaba ka seng kala dep ban leh bad lada kane ka jingpyrshang kan long kaba jop kan sa wan rah ne pysngew sha baroh ki nongshong shnong la ong shuh shuh u samla Chenmiki.