Ki don haduh 23 tylli ki skul kiba la wan ban iashim bynta ha ka District Level Inter School Athletic Meet 2022 kaba la pyniaid da ka ophis District Sports Officer, East Jaintia Hills District kaba la sdang mynta ka sngi.
Ia kane ka lympung la pynlong ha Teilang Playground, Dkhiah West, East Jaintia Hills District ha kaba u Deputy Commissioner ka East Jaintia u Abhilash Baranwal, IAS ula long u kongsan ban plie pyrda ia ka, ha ka jingiadonlang i kong Stephanie M. Rapsang, District Sports Officer, EJH, u ma Coming One Joy Tlang ba dei u General Secretary, East Jaintia District Sports Association.
Ia kane ka lymgpung la pynlong ruh kum shi bynta na ka jingrakhe ia ka jingdap 75 snem ka jingiohlaitluid ka ri India bad ka jingdap 50 snem ka jingioh jylla ba pura ka Meghalaya.
Haba kren kum u kongsan u Abhilash ula iaroh shi katei eh ia ki nongiashim bynta na ki skul bapher bapher namar ka jinglong shlur, ka jinglong iaishah bad ka mynsiem ialehkai wat hapdeng ka jingpynthut jong ka bor mariang. Ula ong ruh ka jingialeh sport ka wanrah ka dor ba khraw ia ki khynnah skul la ka dei ha ka liang ka akor ka burom, ka mynsiem jingialeh bad ruh ka jingktih ban ioh ia ka thong ha ka jingialeh wat hapdeng ki jingeh ba hap ban ia kynduh.
Ki jingialehkai bapher bapher jong kane ka lympung ki kynthup ia ka 60 metre, 100 metre, 200 metre, 300 metre, 400 metre, 600 metre, 800 metre, 1500 metre, 2000 metre, 3000 metre, 4X100 metre relay, Discus Throw, Javelin Throw, Shot Put, High jump bad Long Jump kiba la bynta ha ki lai bynta kata ia ki under 14, under 16 bad under 18 years ia ki khynnah shynrang bad kynthei.
