Ka All Hynñiewtrep People United Front (AHPUF), kum ka dak ka jingiarap kylliang ne kyrshan kylliang, kala ai sngewbha kumba 16 jur ki ben bad ki desk, ki miej ki shuki bad ki Almari, sha ka Jaiñtia Career Coaching Center (JCCC), kaba pyniaid da ka Jaiñtia Educational and Social Welfare Organization (JESWO), kaba don ha Moowamon Mihmyntdu.
Ia kine ki tiar la aiti da u Secretsry ka seng u ma C. Sungoh ha ka jingdon lang u President ka seng u ma John Phawa lem bad ki dkhot ka seng. Ha ka jingiadei bad kane ka jingai sngewbha ka seng, na ka liang ki nongpyniaid ka Coaching Center, lyngba u ma B. Samaiang kila pdiang sngewbha ia kine ki tiar bad kila pynpaw ka jingsngewnguh shikatdei eh ia ka seng AHPUF.
Ka jingthmu ba ka seng AHPUF kala ai ia kine ki tiar jingiarap sha kane ka Coaching Center, ka long na ka daw ba ka sngewnguh ia kane ka Center, halor ki kam jong ka kiba ka la ai jinghikai khlem kano kano ka jingsiew sha ki samla jong ka Ri Lum Jaintia ha ka jingiadei bad ki eksam bapher bapher kum ka DSC, MTET, MPSC, UPSC bad kiwei de.
Na ka liang ka AHPUF ka kitbok kitrwiang ia kane ka Coaching Center, ba kan nangkiew shahkhmat ha ki kam ba bha khamtam kaba dei ia ka lawei jong ki samla ka jait bynriew. Ha kaba ka la kyntu ruh ia ki nongpyniad jong kane ka Coaching Center ba kim dei ban shim kabu ha kyrteng jong kane ka Center hynrei kin ai ka jingshakri kaba bha khamtam ia ki ba duk ba kyrduh.
