Ia ka sngi pynneh pynsah ia ki Ngap ia kaba la tip kum ka World Bee Day la rakhe mynta ka sngi ha nongbah Shillong halor ka phang “Promote Bee Keeping: Augment Farmers’ Income and to ensure Sustainability of Life”, ha kaba u S.C. Sandhu, Secretary to the Government of Meghalaya, Department of Agriculture & Farmers Welfare ula long u kongsan.
Ia kane ka prokram la pynlong da ka tnad Directorate of Horticulture jong ka sorkar jylla. La pynlong ia ka ha All Saints’ Hall, Shillong.
Haba kren ha kane ka sngi u Sandhu ula iathuh shaphang ka jingdonkam jong ki Ngap ha ka ban pynneh pynsah ia ka mariang, ha kaba ula ong ba ka long kaba donkam haduh katta katta ban ia ka jaka shong jaka sah ia ki Ngap ha ka rukom kaba shngaiñ. Ula kyntu ia ki nongrep ngap ba ki dei ban pynbha ia kane ka rukom ri ngap katkum ka juk kaba mynta khnang ba kin ioh shibun ki jingmyntoi na ka umngap.
Ula kyntu ia ki nongri ngap ban ri shibun ki ngap bad ba kala dei ka por ia ki ban pyniaid iew ia ka umngap wat shabar na ka jyla ruh khnang ba kin ioh jingmyntoi khambun, ryngkat ka jingkyrshan jong ka sorkar. Ha kawei pat ka bynta u Sandhu ula pyntip ba na ka liang ka sorkar ka la don jingthmu ban shna ia ki 75 tylli ki pungum ha man la kawei pa kawei ka District jong ka jyla kaba hap hapoh ka Amrit Sarovar Mission kaba ka thong jong ka, ka long ban pynneh pynsah ia ka um ha ki pateng ban wan. Ia kane ka thong la pynmih kum shibynta na ka jingrakhe ia ka Azadi ka Amrit Mahotsav ne ka jingiohlaitluid ka ri India.
Ha kane ka sngi kala don ruh ka jingdie ia ki umngap kiba la wanrah da ki nongri ngap na kylleng ki bynta jong ka jylla. Kala don ruh ka jingai jinghikai ba kyrpang ia ki nongri ngap halor ka phang “Bee Keeping and its prospects in Meghalaya”.
