Kumba ka met ka donkam ia ki jingbam bad ki riam ki beit, kumta ruh ka jabieng jong u briew ka donkam ia ki jingbam bad ki jingbam jong ka jabieng ki long ki kot, la ong u Pa Dalloi ka Elaka Jowai u ma Puramon Kynjing ha ka jingpyllait paidbah jong u ia ka kot ba la thoh da u Rev. Dr. H.H. Mohrmen mynta ka sngi ha nongbah Jowai.
Mynta ka sngi u Dalloi Kynjing ula ioh ban pyllait paidbah ia ka kot ba la ai kyrteng “Ki kjat jingshai ka Mynnor” ba la thoh da u Rev. Dr. H.H. Mohrmen. U Pa Dalloi ula ai ka jingiaroh bad ka jingkyrkhu kyrdoh ia u nongthoh, ha kaba ula pynpaw ba hadien ba u la dep ban pule katto katne ia kane ka kot kaba la phah shwa sha u, ula lap ia ki bynta kiba kyrpang kiba don ha ka kiba pynlong ia u ban don ka jingkylla na ka jingmut barim jong u sha ka jingmut kaba thymmai.
Ula ong ruh ba kane ka kot ka long kaba myntoi haduh katta katta namar lyngba kane ka kot lah ban tip ia ka mynnor bad ka mynta bad ha kajuh ka por kan ai jinghikai ia ka lawei ka ban sa wan. U ong ruh ba bun sien ki nongthoh kot kim ju ioh ka jingmyntoi ialade hynrei kaei kaba ki ioh ka long tang ban pynproh ia ka jabieng bad ban sei ia ka sap jong ki, hynrei kiba ioh jingmyntoi ki dei ia kito ki briew kiba pule ia ki. Kumta ula kyntu ia ki paidbah ban thied bad pule ia kane ka ka kot kaba lah ban ai shibun ki jingmyntoi ia ki.
Ha ka juh ka por u la kyntu ia u Dr. Mohrmen ba un nang pynmih shuh shuh ia kiwei de ki kot nangne shakhmat khnang ba kan long ka jingmyntoi ia ka ri bad ka jaitbynriew hi baroh kawei.
Ia kane ka jingialang pyllait kot la pynlong ha Hall jong ka H.K. Singh Memorial S/S, Jowai. Ha kaba ia ka jingialang la pyniaid da u ma M.M. Thaiang, Vice President jong ka Khasi Authours’ Society (KAS), Jaintia Hills Unit.
Kiwei de kiba ai jingkren ha kane ka sngi ki kynthup ia u Rev. Dr. H H Mohrmen uba la ai ia ka jingkren lamkhmat bad jingkren pdiang ia baroh, na u Secretary ka KAS u samla rangbah Wansalan E Dhar, ka kong R.M. Khonglah na ka Khasi Department jong ka Thomas Jones Synod College, Jowai bad ka samla Mattimi Passah ka khun jong u nongthoh kaba la ai ia ki kyntien ai khublei. Kham hashwa jong ka jingialang la ioh ia ka jingnguh Blei da u Rev. S. Laloo.
