Ka Meghalaya State Skill Development Society (MSSDS) kawei na ki tnad treikam jong ka sorkar jylla kaba ju ai jinghikai ia ki samla ban nang hala ki jong ki jong ki kam ba bun jait kala buh ia ka thong ban kynjoh shaduh ka 1,20,000 ngut ki samla na ka bynta ban ai jinghikai ia ki ha ki liang bapher bapher khnang ba kin lah ban ieng hala ki jong ki kjat.
Mynta ka sngi ka MSSDS kala jied 20 tylli ki kynhun ne ki Local Training Provider (LTP) hapoh ka Skills Meghalaya ha ka jingialang kaba la pynlong ha ophis treikam jong ka.
Ka jingthmu ha jied ia kine ki kynhun LTP ka long ba ma ki kin ai ka jinghikai ha 22 tylli ki jaitkam sha ki 1325 ngut ki samla jong ka jylla. Ki jait kam kiba kynthup ia ka jingsnah na ki siej, ka Data entry Operator, ka jingpynbha ia ka rep ka riang, ka jingbuh ia ki Solar PV, ka jinghikai khapsñiuh, shna lait bad kiwei kiwei de. Kane ka jingai jinghikai kan sdang naduh u bnai Jylliew ban wan.
Ha ka Phase-I jong kane ka prokram ha u bnai Iaiong mynta ka snem ka MSSDS kala jied ia ki 14 tylli ki LTP ban ai jinghikai halor ki 17 tylli ki jait kam, ha kaba 1210 ngut ki samla na kylleng ki bynta jong ka jylla kila ioh jingmyntoi.
Haba kheiñlang haduh mynta jong ka Phase-II ka MSSDS ka la ioh haduh 34 tylli ki LTP ki ban ai jinghikai sha ki samla kiba la buh thong ban kynjoh sha ki 2500 ngut.
Kane kadei ka prokram kaba hap hapoh ka Skills Meghalaya kaba la plie paidbah da u Myntri Rangbah ka jylla u Conrad K Sangma ha ka 8 tarik u Lber mynta ka snem halor ka jingthmu ban pynwan dur bad pyntrei kam ia ka jinglah jong ki khun samla ka jylla da kaba aibor ai mynsiem ia ki na ka liang ka sorkar.
Tang hapoh u ne u snem ka MSSDS kala don jingmut ban ai jinghikai haduh 20,000 ngut ki samla jong ka jylla ha ki jait kam bapher bapher kiba lah ban ai jingmyntoi ia ki.
Ka MSSDS ka pyntip ruh bala don kino kino ki kynhun kiba kwah ban pyniasoh ne pynrung kyrteng hapoh jong ka ki lah ban ioh jingtip kaba bniah da kaba leit ha ka website jong ka : https://mssds.nic.in/Partnerwithus.html