Ka jingialehkai ba 7 Aside Knock Out Football Tournament 2022 kaba lai bala pynlong da ka Sports & Games Committee jong ka shnong Panaliar, Jowai kala poi noh sha kaba kut ha ka jingialehkai Final kaba la long mynta ka sngi hapdeng ka We Sport FC pyrshah ia ka Elang Ki Oo FC ha kaba ka Elang Ki Oo FC kala long ka lahduh jong kane ka Tounament mynta ka kynti.
Ha shwa ban sdang ia ka jingialehkai kala don ka jingialang kaba lyngkot bala pyniaid da u Waheh Shnong ka Panaliar u ma Riquoma Rq. Laloo, la ioh ka jingnguh Blei da u Lamyooki Shullai.
Na ka liang jong u Waheh Shnong ula iathuh ba ia kane ka jait jingialehkai Football la sdang na ka shnong Panaliar ha kata ka por la pyniakhun mar 9 ngut shiliang bad hadien kata la pynlong noh da ka Tiger 7 kaba iakhun mar 7 ngut shiliang. Da ka jingdon jong ki nongkitkam kiba shitrhem kane ka jingialehkai mynta kala bteng 3 snem lynter. U ma Riquoma haba kren sha ki nongialehkai ula ong ba ka por ka long kaba kordor haduh katta katta. Kum ki nongialehkai ki dei ban don ia ka akor ka burom bad ki dei ruh ban tip ban kheiñkoi ia ka por.
U kongsan ha kane ka sngi u dei u ma Saron Pasweth MDC ka thaiñ. U ma Saron ula kyntu ia ki nongialehkai ban long kiba tyngkai bha iala ka jong ka sap kaba kila don khlem da pynsepei ia ka. Lyngba ki sap ba don ki lah ban ka jingmyntoi ia ka lade jong ki, la ong shuh shuh u ma Saron. Ula kyntu ruh ia ki nongialehkai ban long kiba trei shitom ym pher la da rem ne jop. Ula iaroh ruh ia baroh ki nongkitkam shnong ka Panaliar kiba la shim khia ban kyntiew ia ki kam sport hapoh ka shnong ka thaw.
Ia ki kyntien ai khublei la aid a u General Secretary ka shnong Panaliar u ma Careme Phawa.
Ka jingialehkai mynta ka sngi ka la long kaba itynnad haduh katta katta kaba la pynshongshit bad pynsyaid bha ia ki nongwan peitkai. Ha ka jingiakhun naduh ka kyllastep haduh ka kylla miet ym don satia kano kano ka kynhun kaba lah ban pynkhih ia ka jar.
Kumta ha kaba kut la hap ban pynlong noh da ka jingiashut Tie Breaker, ha kaba ka Elang Ki Oo FC kala ioh jop bad iohrah syndon ia ka nam lahduh.
Ia ka nam Man of the Match la ioh da u Felickson Pasleiñ na ka We Sport FC katba ia ka nam Best Goal Keeper la ioh rah da u Confirm Bang na ka Mency FC.
