–Ia pynliew jingmut u PM bad ki nongioh myntoi na ki skhim ka Sorkar Pdeng–
Kum shi bynta na ka jingrakhe ia ka jingiohlaitluid ka ri India ne ka “Azadi ka Amrit Mahotsav” la pynlong ia ka prokram jingiasyllok bad ia phylliew jingmut hapdeng u Prime Minister Narendra Modi bad ki nongioh myntoi na ki skhim jong ka sorkarpdeng ha baroh ki bynta jong ka ri India lyngba ka video conference kaba u PM ula kren na nongbah Shimla, Himachal Pradesh.
Ka jingthmu jong kane ka prokram ka long ban ia kren halor ka jingdonkam ban pyntreihok ia kino kino ki skhim pynroi kiba la ai da ka sorkar pdeng, ryngkat ka jingkhmih lynti ba ka ri India kan long kawei na ki ri kiba la kiew shaphrang tad haduh u snem 2047 kaba dei ka jingdap 100 snem jong ka jingiohlaitluid ka ri India.
Ia kane ka prokram la pynlong ha ka jylla Meghalaya la pynlong ha State Convention Centre Auditorium, Shillong ha kaba u Deputy Chief Minister ka jylla u bah Prestone Tynsong ula long u kongsan, la iadon lang u bah Hamletson Dohling Myntri ka C&RD bad u B.L. Verma, Union MoS, DONER.
Haba ai jingkren u bah Prestone ula kdew ia ki kam kiba ka sorkar Pdeng kala dep ban pynioh jingiarap khamtam ia kiba duk ba kyrduh jong ka imlang ka sahlang. Ula ong ba lyngba ka jingiarap ba khlem kut na ka sorkar Pdeng ka jylla kala iohi shibun ki kam pynroi bad kala pynkylla dur ia ka jylla hapoh kine ki khyndiat snem. U la pynpaw ka jingaikhublei ba kyrpang ia ka sorkar Pdeng na ka bynta ka Meghalaya bad u khmih lynti ba ki jingiarap lyngba ki skhim bapher bapher kin nang iai bteng ban tuid sha ka jylla ha ki snem ban wan.
Ha kane ka prokram, na ka liang u Union MoS u B.L. Verma ula ioh ban iakren bad ia phylliew jingmut bad ki nongioh jingmyntoi na ki skhim ka sorkar Pdeng hapoh ka jylla.
