Ia ka sngi kyrpang World No Tobacco Day (WNTD) kaba dei ka 31 tarik u Jymmang la ju rakhe man la ka snem ban pynpaw sha ka pyrthei halor ka jingsniew kaba mih na u duma kaba lah ban ktah ia u briew shimet, ia ka imlang ka sahlang bad ia ka mariang kumjuh.
Ia kane ka WNTD la thaw ha ka snem 1987 da ki dkhot jong World Health Organisation (WHO). Ka phang pdeng jong kane ka snem ka long “Tobacco : threat to our environment”
Ha kane ka jingrakhe ka sorkar kala ai bynta ia ki skul hapoh ka jylla ban kin leh ar tylli ki kam, kawei ka dei ban pynlong ia ka jingiaid Rally bad kaba ar ka long ban pynlong ia ka Signature Campaign ba ki khynnah skul kin ioh ban pynpaw sha ka imlang ka sahlang halor ka jingsniew jong u duma. Hapoh East Jaintia ruh la pynlong ia kine ki prokram ha kaba la sakhi ba ki khynnah kila iashim bynta shitrhem bha da kaba iaid sha ki jaka paidbah bad jaka iew.
Na ka liang u A. Baranwal, IAS Deputy Commissioner, East Jaintia Hills District, Khliehriat u la pynpaw ba u duma ym dei ba u pynjot tang ia u briew hynrei u pynjot ruh ia ka Mariang. Ula ong ba ka jingpyndonkam palat ia u duma ka wanrah ia jingpang bad ka jingkhlad bym dei por bad ka buh jingkhia pat ia ka ïing ka sem. U kyrmen ba ka jingpyntreikam ia ka ToFEI kan iarap ia ki samla ban pynkylla ia ka jinglong jong ki nongshong shnong sha ka jingpynduna ka jingpyndonkam ia u duma.