Mynta ka ophis jong ka Divisional Soil & Water Conservation, Officer Jowai Teritorial Division, Jowai, ka la rakhe ia ka World Environment Day, ha Moosyiem Shangpung West Jaintia Hills District, halor ka phang “Only One Earth, Living Sustainably in Harmony With Nature” ha kaba u ma Comingone Ymbon MLA ka thain uba long ruh u Chairman ka Meghalaya Industrial Development Corporation, u la long u kongsan ha ka jingiadonlang u Doloi ka Elaka Shangpung u ma Chanki Langbang bad kiwei de ki riew rangbah bad sahep sorkar.
Ia ka jingialang la pyniaid da u DS&WCO Jowai Territorial Division Jowai ma T. War, ha kaba la ioh ruh ka jingkren na u ma Richardson Langbang Waheh Shnong Moosyiem, kong E.Shylla AS&WCO Jowai Territorial Division, Jowai.
U ma Coming haba kren u la ong ban thung ia ki dieng kam don kano kano ka jingmyntoi lada ngim ri sumar ia kito ki dieng kiba ngi la thung, na ka liang jong u, u la kyntu jur ia kiba thung ia ki dieng ba ki dei ban ri sumar ia ki khang ba kin ioh ban heh ban san ban long ka jingmyntoi lym kumta kam don jingmut ei ei ruh.
U ma Coming u la kyntu ia ki briew ban sangeh syndon ka jingthang dusmon ia ki khlaw ki btab, namar ka jingthang khlaw ka wan rah ka jingduh nong kaba khraw ym tang ia ki jait dieng ne ki phlang ki kymbat hynrei ka pynduh jait ruh ia ki mrad ki mreng bad ka pynjulor ruh ia ki um ki wah. U la ong ba lada ym don ki briew kiba jrongkti ha ka ban thang ia ki khlaw ym don kam ban thung ia ki dieng namar ki dieng ki mih hi, bun bun shah ha ka shi snem, kumta na ka liang jong u la kyntu ia ka tnat treikam jong ka sorkar kaba dei peit ia ka khyndew bad ki um ki wah ban shim ia ka rai ban buh noh da ka jingpynshitom ia kino kino kiba donkti ha ka ban pynjulor ia ki khlaw ki btab, kumjuh ruh u la kyntu ia ki paidbah kiba tip ne iohi ia kum kine ki briew kiba pynjulor ia ki khlaw ki btab ki dei ban pyntip mar mar sha ki Waheh Shnong ne sha ki bor jong ka sorkar.
Mynta ka sngi na ka liang u kongsan, ki sahep ka Soil ryngkat bad ki khynnah skul ki la shim bynta ruh ha ka ban thung ia ki dieng ha rud ka madan Moosyiem bad sha kiwei de ki jaka. La sam ruh ia ki khusnam sha ki khynnah skul kiba la iashim bynta ha ka jingiakop ban thoh ki kyntien iada mariang (Slogan).
La pynphuh pynphieng ia kane ka sngi da ki jingrwai jong ki khynnah skul jong ka Presbyterian Higher Secondary School Shangpung bad na ka Shlem Iong ki Sur Tynre Shangpung.
