Ka tnad of Agriculture ryngkat ka jingiatreilang bad ka ISBD, Shillong kum shi bynta na ka jingrakhe ia ka taiew pynneh pynsah mariang kila pynlong ia ka jingthung ia ki dieng soh mynta ka sngi ha Juvenile Homes, kaba don ha Mawkasiang.
Ha kane ka prokram u S.C. Sadhu, IAS Secretary Department of Agriculture and Farmers’s Welfare ula long u kongsan. La iadonlang ruh u bah S. Rani, Deputy Director of Agriculture (Agro), u bah L. Lyngdoh, Assistant Director, Social Welfare Department, i kong M. Warjri, District Child Protection Officer, Social Welfare Department bad I kong R.M. Majaw, Director of Agriculture ryngkat bad ki khynnah jong ka Juvenile Homes.
Haba kren ha ka jingialang u Sadhu ula pynshlur ia ki khynnah bad ia baroh kiba don lang ha kane ka jingialang ban long kiba shimkhia ban pynneh pynsah ia ka mei mariang. U Sadhu u pynpaw ka jingkyrmen kaba khraw ba kane ka jaka ha kaba la pynlong ia kane ka jingialang kan long ka jaka ha kaba la pynrung ha ka jingmut jingpyrkhat jong kito kiba dang khie dang san ba ynda kila heh la san kin tip shaphang kumno ban sumar ia ka sawdong sawkun.
Ha kane ka sngi kumba 100 tylli ki dieng soh ka kynthup ia ki soh plom, ki sohphoh, bad ki sohpriam la thung ha phyllaw jong kane ka jaka sumar ia ki khynnah.
