U surok ba pyniasoh naduh lad Kiang Nangbah Govt. College shaduh sha Jowai District Jail ula shah ieh beiñ mynta la bun bun snem bad ka jinglong jingman jong une u surok kala pynjynjar sat ia ki nongleit nongwan la ka dei kiba iaid kjat ne kiba shong da ka kali ruh kumjuh.
Une u surok udei u wei na ki surok uba kongsan bha namar lyngba une u surok la pyniasoh ia ki ophis sorkar kiba kongsan kiba kynthup ia ka ophis jong ka Jowai Fire Service, ka ophis Police Reserve bad ka Jowai District jail.
Nalor kine ki ophis sorkar une u surok u pyniasoh ruh ia kawei na ki jaka ai jinghikai (Vocational Training) ba pawnam bha ha ri lum Jaiñtia ka Bosco Pnar, nalor kane ka don ruh ka skul jong ka tnad Police nalor ki jaka sah jong ki Police (Quarters) naduh kiba heh kyrdan haduh kiba rit kyrdan.
Ym tang katta u ne u surok u don ruh hapoh ka Dong Salini Colony kaba dei ka bynta jong ka shnong Mihmyntdu kaba mar syndah bad ka nongbah Jowai. Ki nongshong shnong kiba hap ban iaid lyngba ia une u surok kila pynpaw ka jingbynñiaw kaba jur, khamtam ha kine kipor slap bun ki bynta jong u surok ki long kiba dap bad lang um. Nalorkata bun ki bynta jong u surok kila paw satang ki maw khohruh khohram, nalor ka jingbym biang shuh ki nala um, kaba la buh ha ka jingeh ia ki nongleit nongwan.
Na ka liang jong ki nongshong shnong kila buh ka jingkyntu ia ka tnad PWD ba ka dei ban maramot kloi ia une u surok, khnang ba kan pynsuk ia ka leit ka wan u paidbah khamtam ruh ia ki khynnah pule ha kitei ki ar tylli ki jaka pule ba kongsan.