U MLA ka Jowai Constituency ma Wailadmiki Shylla mynta ka sngi ula plie paidbah ia ka dukan sha bad ja kaba la ai kyrteng ka M/s S. Pakynteiñ Restaurant, kaba dei jong i kong Shibor Pakynteiñ kaba don ha surok bah Ladthadlaboh mar pyrshah bad ka M/s K. Rymbai Petrol Pump Jowai.
Hashaw ban ot ia u ribon la don ka jingïalang ba lyngkot ba la pyniaid da u ma P.R. Lamare, la ioh ruh ka jingkren na u Waheh Shnong ka Mihmyntdu ma Abul Phawa bad la ioh ka jingkren na ka ktien U Blei na u Rev. D.S. Lyngdoh.
Na ka liang u MLA kum u kongsan haba ai jingkren ula ong ka jingdon ki dukan kan iarap ruh ban pynioh kam pynioh jam ia ki khun samla, ha ka juh ka por u ong ba ka jingshimkhia jong ki trai ri trai muluk ban seng dukan ne kam lajong kan iarap ruh ban khanglad ia ki briew kiba nabar ban wan knieh ia ka jakpoh jong ki trai jylla.
Ula ong ruh ba bunsien kiba bun ki kam la wan trei beit da ki bar jylla namar ka jingbym treh jong ki khun samla ban shim ia kine ki kam ba bun hapoh ka jylla la jong. Kumta u kyntu ia kiwei de ba kin bud ia kane ka nuksa ba bha jong kane ka longkmie kaba la dep ban shah hikai ha kane kam shet bam bad mynta kala ieng hala ki jong ki kjat da kaba pyniar shuh shuh ia ka kam.
Shuh shuh ula pynsngew wat na ka liang jong ka sorkar kala wanrah shibun ki lad jingiarap ia ki samla lyngba ki loan bapher bapher na ki Bank ha ryngkat ka subsidi, u ma Wailad ula ai ruh ka jingkitbok kit rwiang ia katei ka longkmie ba kan dang lah ban pyniaid ia kane ka kam shakhmat bad ban ai ka jingshakri kaba bha tam ia ki paidbah.
Ha kane ka sngi la don ruh ka jingot cake da ka trai dukan bad ka jingkhap ia u ribon da u kongsan. Kane ka Restaurant ka don ruh ia ka Hall na ka bynta ban pynlong ia ki jait prokram bapher bapher.
