Jowai: Ki ar ngut ki nongñiah Bicycle na ka jylla Bangalore kiba dei ruh ki member jong ka Rotaract Club ka Shishu Mandir, Bengaluru ki la don ka thong ban iaid kylleng ka ri India haka jingjngai kaba 24,000 kilomiter hapoh ka 180 sngi da kaba thmu ban poi sha kii 29 tylli ki jylla bad 3 tylli ki Union Territories hapoh ka ri India.
Kine ki ar ngut ki nongñiah cycle ia kiba la tip kyrteng u Dhanush M. na Kadugodi bad u Hemanth Y.B na Yadagondanahalli kila poi ha West Jaiñtia Hills mynta ka sngi Saitjaiñ ha CTC Orchid Inn Thadlaskeiñ Mukhla bad la pdiang burom ia ki da u President Rotary Club Jowai u ma S. K. Lato.
Ia kine ki nongñiah Cycle la iarap pisa lyngba Rotary Bangalore Whitefield Central (Dist.3190) ha ryngkat ka International Fellowship of Cycling Rotarians (Dist.3190), Shishu Mandir Education Center, Maithri Aqautech Pvt Ltd, bad ka Dr. Durga Prasad Reddy (Cardiothoracic Surgeon, Bangalore).
Ka thong jong kine ki nongñiah Cycle ka dei ban pyndep ia katei ka jingthmu bad ban ai ruh ia ka khubor jingiada ia ka mei mariang na ka jingshit (Global Warming), kumjuh ruh ban ai jingai jinghikai halor ka jingdonkam jong ka pule ka puthi. Ki don ruh ka thong ban ioh bat ia ka Guinness Book of World Record da kaba pyndep ia katei ka jingñiah Bicycle kaba jngai tam.
Kitei ki ar ngut ki la sdang ban mih na Bangalore naduh ka 11 tarik u July bad haduh mynta ki dang pyndep ban ïaid kumba 8 tylli ki jylla kaba la poi 5,500 kilomiter, nangne kin leit sha Assam, Umrangsoh bad sha Nagaland, Arunachal Pradesh wan phah biang sha Assam, kin bteng ban leit sha khappud Nepal bad rung sha Bihar, Uttar Pradesh, Haryana bad sha kiwei de ki jylla ba dang sah, la ong u Dhanush haba ïakren bad ki lad pathai khubor.
Shuh shuh u Dhanush u la ong ba u don ka jingkyrmen ba ki khynnah skul kin bteng biang ia ka jingpule hadien kane ka khlam khnang ba kin ioh ka jinghikai kaba biang khamtam kito kiba hapoh ka 14 snem ka rta.
La iathuh ba kine ar ngut ki dei ruh ki nongkiew lum jong ka ri kiba la shim bynta ha kiba bun ki jingiakhun (Competition). Ha ka juh ka por kitei ki nongñiah Bicycle kila kyntu ia ki paidbah ba kin pyndonkam ia ki bicycle ha ka leit ka wan khamtam ha ki jingjngai kiba tang 2 lane 3 kilo miter namar kane ka long kaba donkam ha ka liang jong ka koit ka khiah bad kan iada ruh ia ka mariang, ula pynsngew ruh ba ka jylla Meghalaya ka don ia ka mariang kaba itynnad bad ka ba khuid ba suba.
