Jowai: Kum shi bynta ka jingrakhe pyndon burom ia ka jingdap ba 75 snem jong ka jingioh laitluid jong ka ri India, ka jingdap 50 snem jong ka jingiateh paralok hapdeng ka India bad Bangladesh kaba long ruh shibynta ka jingiohlaitluid ba 50 snem jong ka ri Bangladesh, kumjuh ka jingdap 50 snem jong ka jingioh jylla ba pura jong ka jylla Meghalaya kala don ka jingialang ba lyngkot hynnin ka sngi ha ka BSF BOP – India Bangladesh Border, Dawki – Tamabil.
U Commissioner and Secretary jong ka Arts and Culture ka jylla u bah F.R. Kharkongor ula ai ka jingkren ba kyrpang halor kitei ki lai tylli ki phang kiba don ka jingiadei kaba jan bha bad ka ri Bangladesh. Ha kane ka sngi u bah Kharkongor ula aiti ruh ia ki tiar tynrai kum ki jingshna bad ki jaiñ tynrai kiba la pynmih napoh ka jylla Meghalaya ha u Neeraj Kumar uba dei u Assistant High Commissioner jong ka Sylhet High Commission of India na ka bynta ban buh pynsah nam ha Indian High Commission ha nongbah Dhaka.
U bah Kharkongor ula iohlad ruh ban pynkynmaw halor ka jingdonkam ba pynkhain shuh shuh ia ka jingiadei hapdeng ka ri India ba Bangladesh lyngba ka jylla Meghalaya ha ka liang ka khaïi ka pateng bad wat ha ka liang ka pule puthi ruh. U bah Kharkongor ula pynkynmaw ruh ia ka jingim jong u Tirot Sing Syiem, uba la shah set byndi ha ki bor Phareng ha nongbah Dhaka, hadien ka jingialeh pyrshah ia ka jingsynshar jong ki naduh u snem 1829 haduh 1833. U la pyntip ruh ba ka jylla Meghalaya ka la phah ia ka jingtyrwa sha ka Ministry of External Affairs na ka bynta ban buh ia u dur mot ban pynsahnam ia u Tirot Sing ha Culture Centre jong ka India High Commission ha nongbah Dhaka.
Na ka liang jong u Neeraj Kumar ula ai khublei ia ka sorkar Meghalaya na ka bynta ka jingpynioh ia kine ki tiar bad ki jingsuh tynrai na ka bynta ban buh pynsah nam ha katei ka ophis treikam jong ka ri. Kiwei pat ki nongkren na katei ka High Commission, Sylhet kila pynpaw ka jingiaroh halor ka jingkiew shaphrang jong ka ri India hapoh kine ki 75 snem ha ki liang baroh naduh ka Riti ka dustur, ka imlang sahlang bad ha ka khaïi pateng.
Kham ha shwa na ka liang jong u Abilash Baranwal, IAS, SDO (Civil) Amlarem Sub-Division ula ai ia ki kyntien pdiang burom ia baroh kiba la poi sha ka jingialang. Kiwei de kiba la ia don bynta ha kane ka jingialang ki kynthup ia u T.G. Ramesh, Head of Chancery, AHC Office, u Sanjeev Kumar, Second Secretary (Visa & Consular)/Commercial Representative, AHC office Anil Kumar, 2 IC, 30th battalion bad ia ki kyntien ai khublei la ai da u K. L. Nongbri, Joint Secretary, Arts and Culture, Meghalaya.
