U Deputy Commissioner, East Jaintia Hills District, Khliehriat, u A. Baranwal, IAS, mynta ka sngi u la pyllait paidbah ia ka ‘Weekly Podcast’ kaba dei ka prokram kaba ki paidbah ki lah ban sngap lyngba ki Social Media kum ka Facebook, Youtube Channel bad ka Whatsapp ia ki skhim sorkar bapher bapher.
Ia kane ka prokram la plie mynta ka sngi ha Conference Hall jong ka ophis u DC Khliehriat ha ka jingiadon ryngkat u bah S.S. Syiemlieh, MCS, Addl. DC, East Jaintia Hills District bad u ma J. Shylla, Addl. Deputy Commissioner, East Jaintia Hills District, Khliehriat bad kiwei de ki sahep sorkar.
Haba kren ha ka jingialang na ka liang jong u DC ula iathuh ba ka jingthmu jong kane ka prokram ka ban sa pynmih shisien shi taiew na ka ophis jong u DC, Khliehriat ka long ban ai jingtip sha ki paidbah halor ki skhim bad ka jingtreikam bapher bapher jong ka sorkar jylla bad kumjuh jong ka sorkar pdeng.
Kan long ruh shi bynta ban pynshlur ia ki nongshong shnong ban wan shakhmat ban shim ia ki lad ki kabu bala pynioh da ka sorkar.
Nangne shakhmat ia kane ka prokram lah ruh ban iohsngew lyngba ka Youtube channel DCEastJaintiaHills.