Mynta ka sngi ia ka International Day against Drug Abuse and Illicit Trafficking halor ka phang “Addresing Drug Challenges in Health and Humanitarian Crisis” la pynlong ha Dong Wahshnong LP School Rymbai, East Jaintia Hills District.
Ia kane ka prokram la pynlong da ka ophis District Social Welfare Officer, East Jaintia Hills District ha ka jingiatrei ryngkat bad ka ophis District Medical and Health Officer, Adolescent Health Clinic, Khliehriat, bad ka Meghalaya State Rural Livelihood Society bad ki Self Help Groups (SHGs).
Haba kren ka kong R. Passah, District Social Welfare Officer ka ong ba ia kane ka sngi la ju rakhe ha man la ka 26 tarik jong une u bnai da jingthmu ban pynsaphriang ia ka jingpynsngewthuh sha ki paidbah shaphang ka jingsniew jong ka jingpyndonkam ia u drok bad ka jingktah jong u ha ka imlang ka sahlang. Ka khot ia ka jingiatrei lang jong baroh ki longkmie longkpa, ka imlang ka sahlang bad iatrei lang bad ka sorkar na ka bynta ban pynduh pyndam ia kane ka jingjyllei jong u drok na ka bynta ka jingbha jingmiat jong ki samla ka District.
Kiwei de kiba la ai jingkren kynthup ia ka kong R. Patlong, Programme Manager, MCSWA, u ma W. Lato, Sub-Inspector SP office, Khliehriat, kong Daphihi Passah, ma P.S. Dkhar bad kiwei.
Ha kane ka prokram la don ruh ka jingsam prais sha ki nongjong ha ka jingiakop draw dur. Ha kane ka sngi kala don ruh ka jingiaid Bike Rally kaba la pyniaid da ka ophis ka DSWO bad ka Tuber Biker’s and Tour Association kaba la sdang na Tuber Kmaishnong shaduh sha Dienchynrum ha ryngkat ka jingsam ia ki kot lyngkdop sha ki paidbah.
