Ka District Project Management Unit (Meghalaya Basin Management Agency), East Jaintia Hills District mynta ka sngi (29/6/22) kala pynlong ïa ka prokram ‘Knowledge Sharing Event of Best Practices’ ha Khliehriat West Community Hall, ha kaba u Abhilash Baranwal, IAS, DC ka East Jaintia Hills ula long u kongsan.
Ïa ka prokram la sdang da ka jingpyni na ki katto katne ki nongrep, ki nongsengkam lajong na ki shnong bapher bapher kila pynpaw ïa ka jingtip jong ki, ka jingtrei jong ki bad ka jingjop jong ka kam jong ki.
U DC ula ong ba kane ka prokram ka long shi bynta ban leh burom ïa ka jingjop jong ki nongsengkam lajong, kiba lah ban ai ka jingïasyllok sha kiwei pat ki nongshong shnong ba kin nang ban jied ïa ki kam kiba lah ban ïeng hala ki jong ki kjat ha ryngkat ka jingïarap kaba dei ban ïoh na ki tnad sorkar bapher bapher.
Shuh shuh u Baranwal u ong ba ka jylla Meghalaya ka dei kaba bun ki nongshong shnong ha ka rta kaba samla. Ula ïathuh ruh ba ka sorkar naduh ka sorkar Pdeng bad sorkar jylla kila pyrshang ban pynïoh ïa ki lad ban pynkiew ïa ka jingnang jingstad hapdeng ki samla. Wat la baroh kin ym lah ban ïoh ïa ka kam sorkar, hynrei ka dei ka bynta ban pynsgnewthuh ïa ki samla ba kin nang ban seng ki kam lajong bad ban aikam ruh ïa kiwei khnang ba ïoh pyndap ïa la ka ïing ka sem. Ula ong ba kumba long mynta ki dang don bun ki jingdonkam jong ki nongshong shnong ka jylla ki dei kiba wan nabar, kumta lada ki samla ki lah ban shim ïa kane ka kabu ban pynmih hi nala ka jylla ïa kine ki jingdonkam kan long ka jingïarap kaba khraw ha ka ïoh ka kot jong ki.
La ïoh ruh ka jingkren na u bah Hunlang Blah, DPM, District Project Management Unit (MBMA) uba la ong ba ka jingthmu jong kane ka prokram ka long ban ai mynsiem ïa ki nongrep bad ki nongsengkam lajong ba kin nanglah shuh ban treishitom ban poi sha ka thong jong ka jingjop ha kano kano ka kam ba ki trei.
U DC ryngkat ki sahep sorkar kila sam ïa ki memontos sha ki 10 tylli ki nongïashim bynta kiba tbit hapoh ka District, kiba kynthup ia ka Iongkaluh VEC (INRM Sub Committee) kaba la ïoh ka ka nam lahduh ha ka ‘Water Consercation & Irrigation’, ka Jalyiah Integrates Village Cooperative Society (IVCS) nam lahduh ha ka ‘Rural Finance’, ka Shankylliang Producers Group (PG) halor ka ‘Handicraft’, ka shnong Mukhaialong ha ka ‘Best Practices on Neutralizing Acidic Water (Open Limestone Channel)’ bad ïa ka nam lahduh ha ka ‘Conservation of Environment’ la ai sha ka shnong Moolamylliang.
La ai memento ruh ïa u ma Sunshine Ryngkhlem na ka shnong Wapung Skur uba la lehbha ha ka ‘Piggerty & Apiculture’, ïa ka kong Iahphang Dkhar na shnong Tuber Shohshrieh halor ka kam ‘Strawberry Farming & Homemade fruit wine’, ïa u ma Marius Tlang na ka shnong Umrasong halor ka ‘Piggery & Pineapple cultivation’, ïa u ma Serious Dkhar na Ladwah Wapung halor ka ‘Floriculture’, ka kong Kyrsiem Ryngkhlem na Wapung Skur halor ka phang ‘Organic Manure’.
Kiwei de kiba la ïadon ryngkat ha kane ka prokram ki kynthup ïa u ma H. Kharbuki Superintendent of Fisheries, East Jaintia Hills District, bah R. Lyngskor, Executive Engineer, Water Resources Department, East Jaintia Hills District, kong M. Shylla, District Agriculture Officer, East Jaintia Hills District, ma S. Pasweth, General Manager, District Commerce & Industries Centre, East Jaintia Hills District, ma G. Pala, Functional Manager, District Commerce & Industries Centre, East Jaintia Hills District bad u ma H. Nongpluh, District Animal Husbandry and Veterinary Officer, East Jaintia Hills District.