Ka jylla Meghalaya ka long kawei na ki jylla kaba la ioh ban rah ia ka nam ‘Best Performer’ ha ka jinglah ban pyntreikam ia ki jingai jingkyrshan ia ka prokram Start-up Ecosystem kaba la pyntreikam habaroh kawei ka ri India.
Ia ka resol jong kane ka 3rd Edition jong ka jinglum jingkheiñ la pyllait da u Piyush Goyal u Myntri ka Commerce and Industry jong ka sorkar pdeng mynta ka sngi.
Napdeng ki 24 tylli ki jylla bad 7 tylli ki Union Teritories kiba la iashim bynta, la bhah ia ki ha ki 5 tylli ki jinglah, kita ki long ka ‘Best Perfomers, Top Performers, Leaders, Aspiring Leaders bad ka Emerging Startup Ecosystem.
Ka jylla kala ioh rah ia ka kyrdan Best Performer, ryngkat bad ar tylli kiwei pat ki jylla kata ka Gajarat bad ka Karnataka. Kane kala wanrah ka burom ia ka jylla bad ia ki nongsengkam jong ka.
Ka jylla Meghalaya lyngba ka jingiohi jngai jong u Myntri Rangbah la pynmih ia kawei ka prokram bala tip kum ka PRIME (Promotion and Incubation of Market Driven Enterprises) kaba la pyllait paidbah ha u Kyllalyngkot 2020. Lyngba kane ka prokram kila don haduh 1300 ngut ki nongsengkam lajong kila ioh jingmyntoi.
