Amalarem: Ka JSU War Jaintia Circle ka sngewdei ban kyntu ia u Deputy Commissioner ka West Jaintia Hills District ma Garod LSN Dykes (IAS) ba un phai lem sha ka jingeh ba ki nongshong iew bad ki nongkhaïi ki jong ka thaiñ War Jaintia ki ia kynduh na ka jingwan lynshop kane ka khlam Covid-19 kaba la hap ban khang lut ia ki iew ki hat bad ki jaka khaïi pateng baroh.
Kumta halor kane ka phang ka JSU War Jaintia Circel ka kyrpad ia u DC ba un ai lad ban plie noh ia kine ki iew kiba don ha thaiñ War kiba kynthup ia ka iew Bakur (Dawki, iew Muktapur bad ka iew Jaraiñ, hadien ba ka la don ka jingpyn jynsur ia ka long ka man hapoh ka District. La pynpaw ba kine ki iew ki dei ki pliang ja jong ki nong War Jaiñtia hi baroh.
Kat kum ka jingioh jingtip jong ka Seng la iathuh ba ka jingkhang dam ia kine ki iew la kumba 3 bnai kynthih ka la pynsohsat bad wanrah jingeh shibun khamtam ki nongkhaii ha kaba don napdeng jong ki kiba hap ban lilam wat ia ki jingdon jingem jong ki namar um don lad shuh ban kamai da kumwei pat.