Ka kynhun ki khlur mattithaw na kylleng ka pyrthei ki la wan iuhkjat ha nongbah Shillong na ka bynta ka lympung thohdur satlak pyrthei ba la jer ‘Cross-Cultural Identities- A Dialogue through Art’ na ka bynta san sngi naduh 4tarik haduh 8tarik Naitung, 2022 ba la pynlong ha dulan jong ka ICSSR-NERC, North Eastern Hill University.
La plie ia kane ka lympung thohdur da u kher rangbah ka tnat sorkar jylla, Mattithaw bad Deiriti, Shri F R Kharkongor, IAS, Commissioner and Secretary to the Government of Meghalaya, Arts and Culture Department. Ha ka jingkren plie ia kane ka lympung u kongsan u la kynthoh sani halor ka san ka mer jong ka shaipyrthei jong ka mattithaw. U kongsan Bah F R Kharkongor u la kren mardor “Ka Juk Karkhana ka la pynsuk ia ka longbriew manbriew da ki kor ki bor ki ba khraw, nangta ka juk jong ka pathai jingtip ka la thaw ia ka lynti ban byrshem ki kam jong ka imlang sahlang bad ka deiriti ha satlak pyrthei bad ka long ka ba pyrshi ha man la ki kam ba kongsan ha ka imlang sahlang; hynrei u la ban jur ba mynta ka dei ka juk jong ka mutdur lyngba ka jabieng baproh ka ba la bsa ban pynsnoh salonsar ia ki paidbynriew ha pyrthei lyngba ka mattithaw’.
Ha kaba iadei bad ki barikor ki ba wan na kylleng ka pyrthei u la ong, ‘Ka mattithaw ka dei ka kor pynsnoh ka ba byrshem ia ki paidbynriew bad ka pyndam noh ia ka phrah ba kah ha ki deiriti bapher jong ka pyrthei, bad ka la kynshew ha ka thiar mattithaw jong ki barikor bad ki myllung ba kin san kin mer ha ka imlang sahlang’.
Ia kane ka lympung mattithaw la kyrshan da ka ICSSR- NERC ha ryngkat ki jingkren ba la shim bynta da ki kynrem lyndan jong ka thohdur thohdar na ki ri Thailand, South Korea, South Africa, Sri Lanka, bad India. Na ka thaiñ shatei lammihngi ka Ri India la mihkhmat da ka Dr Moushumi Kandali na Tezpur University, Dr. Nabajit Deka, Principal Government College of Arts & Crafts, Assam, Bah Benedict Skhemlang Hynñiewta na Centre for Cultural & Creative Studies, North Eastern Hill University, bad u Bah Raphael Warjri, Chief Creative Director Riti Academy of Visual Arts.
Napdeng ki ba wan na kylleng ka pyrthei, u Dr. Nawat Lertsawaengkit na Silpakorn University u la kren halor ki dur ba la ohdur bad sburrong shaphang jong u seiñryngkew (mythical serpent) ba la jer da u Nantopanantthasut Kamluang ha ka ktien Thailand. U Dr. Khan Payungphan of Phuket Rajabhat University, Thailand, u la tai sani halor ki dak ki shin ba la thohdur ha ki lieng halor ki wahbah jong ka thaiñ ba shathie jong ka Ri Thailand.
Na ki barikor na jylla, u Bah Benedict S Hynñiewta u la kren bniah halor ka thohdur katkum ba ka phalang lyngba ki snap jong ka deiriti tynrai ki ba dang shynna bad ki ba dang dei ban thwet ia ka snap tynrai Khasi. U bah Raphael Warjri u la kren sani halor ka jingngeit Khasi ba sang ban thohdur bad ka jinglong synlar jong ki mar ba shynna ki ba khlem ohshrong ohshrup. Ka Dr Moushumi Kandali na Assam ka la sam ki jingtip ba kongsan jong ka thohdur thohdar jong ki ba bun ki paidbynriew ha ka dong shatei lammihngi jong ka Ri India.
Ha kiwei kiwei ki bynta ba dei banthohdur ki barikor baroh lang ki la shim bynta ban sborrong da ki snap jong ka deiriti katkum ba ka phalang ha ka imlang sahlang. Kiwei pat ki barikor ki la thawdur da ki snap ki ba phalang shaphang ka jingjulor jong ka pyrthei mariang na ka daw ba la mushlia than ki paidbynriew ha kylleng ka pyrthei; bad ki don pat ki ba la byrshem ia ka deiriti tynrai Khasi bad ka jingsngewthuh ha ka parin jong ka satlak pyrthei. Kiba kham pawkhmat na kine ki barikor ki long u Dr. Ajay Kumar Sharma na Chitkara University, Punjab, Dr. Sukumala Nithipattaraahnan na Silpakorn University, Thailand, Dr. Keawtrakan Kunlabon na Thailand, Yihwa Kim na South Korea, Pittawan Suwapab na Thailand bad Hyoji Park na South Korea.
Ha ka sngikhatduh jong ka lympung ka la don ka jingkren na u kongsan Prof Bhagirathi Panda, Honorary Director ICSSR- NERC, bad symbud kongsan Bah Munish N Singh, Director, Indian Council for Cultural Relations, Shillong. U Bah Raphael Warjri u la kynthoh kyllum halor ka lympung ki barikor ki ba la thohdur ha kine ki san sngi bad u la pynkynmaw ia ki snem ba la leit ha ka ba la pynlong ia ka lympung satlak pyrthei ban pyninam ia ka mattithaw lyngba ka thohdur ka ba la long ha u snem 1999 halor ka phang jong u Hynïiew bad u Khyndai, nagta ha ka 2006 la pynlong ka lympung Thohdur ba la jer ka Thoh Shun ka ba la pawnam bha ha jylla. Hynrei u la kubur tyngeh ia kane ka khep mynta ha ka ba ka synjuk Positive Energy Art Foundation ka la mait lynti ban pynkhreh ia ki barikor na ka thaiñ bad khamtam na ka jylla ba kin iohlad ban pyninam ia ka sap ka phong ha ka mattithaw ha ki parin bad rynsan jong ka pyrthei.
Ka jingthmu jong kane ka lympung ka long ban kyntiew ia ka thohdur ha jylla bad ban rahnam sha kylleng ka pyrthei, lyngba ka jinglam lynti jong u Dr. Prakash Kishore u ba la buh jingmut ban iai bteng ia kum kane ka lympung ha ki snem ki ban dan wan. La pyniaid ia kane ka lympung bad la pynbit pynbiang da ka Umeshwari Dkhar, ryngkat ka jingkyrshan bad sam bynta jong ki kynrem lyndan bad simpah simsong ba kynsai jong ka jylla.
Ha ka ba wai artat la sam ruh ia ki khusnam sha ki barikor baroh bad la pynlong ia ka thup pyninam ba la pyrto da baroh ki ba la wan ban sakhi ia kane ka lympung ba kynsai.