Mynta ka sngi ia ka Bijli Bahotsav hapoh ka Ujjwal Bharat, Ujjwal Bhavishya-Power @ 2047 la rakhe mynta ka sngi ha Nongpoh kum shi bynta ruh na ka jingrakhe ia ka jingioh laitluid ba 75 snem ka ri India.
Ha kane ka prokram u bah Mayralborn Syiem, MLA ka Nongpoh ula long u kongsan. Na ka liang u bah Syiem u pynpaw ka jingsngewsarong halor ka jinglah jong ka ri India ban pyntreikam ia ka Jal Jeevan Mission Scheme. Ula iaroh ia ka tnat kaba pyntreikam ia kane ka skhim hapoh Ri Bhoi District namar ka long ka skhim kaba jop. Ula pynkynmaw ruh ba kum ki nongshong shnong jong ka ri India dei ban sngewsarong ia ka jingriewspah jong ka ri ha ki riti dustur bapher bapher.
La ioh ka jingkren na u bah M.B. Tongper, Additional Deputy Commissioner, Ribhoi uba long kum u symbud kongsan, uba la batai shaphang ki jingmyntoi kiba lah ban ioh lada nang ban kynshew ia ka bor ding elektrik, ula iaroh ruh ia ka sorkar halor ka jinglah jong ka ban pynkiew sted ia ka jingpynmih bor ding hapoh ka ri hapoh kine ki khyndiat snem.
U Abhishek Kumar, Deputy General Manager, NEEPCO ha ka jingkren sdang ula pyntip ba ia ka Bihli Mahotsav la rakhe ha ki 773 tylli ki District hapoh ka ri bad ha ki ar-ar jaka ha man la kawei kawei ka District. Ia kane ka jingrakhe la leh kum shi bynta ban lehkmen ia ka jingioh laitluid ba 75 snem ka ri India bad ia ki dak sah jingkynmaw ia ka khana ba la leit, ki jingjop jong ki por bala leit bad ka jingai mynsiem ia ka pateng ka ban sa wan.
U Kumar ula ong ba ka ri India ka don mynta hapdeng ka jingkiew bha ha ka liang ka jingpynmih bor ding ha kine ki 8 snem hapoh ka jingialam ba tbit u Prime Minister ka ri u Narendra Modi.
La ioh ruh ka jingkren na u P.K. Bora, Executive Director, NEEPCO, ki ophisar jong NEEPCO bad na ka State Power Department kumjuh na ki ophisar jong ka District Administration.
Ki Rangbah Shnong kumjuh ki nongshong shnong kiba najan bad najngai kila wan ban sakhi lang ia kane ka prokram. La don ruh ka jingiamir jingmut, ka jingshad tynrai bad ka jingpyni ia ki phlim ba lyngkot ha ka jingiadei bad ka jingpyndonkam ia ka bor ding.