Kum ka dak jong ka jingsngewsih bad jingpyrshah jur kiba haïing jong u ma (L) Thomlin Suchiang uba dei u nongseng jong ka skul Sawlyngdoh Higher Secondary School, Mowkaiaw kila tap noh da ka jaiñ iong ia ka dur Mot jong u kaba don ha phyllaw jong katei ka Skul.
Katkum ka khubor bala phah da kiba haïing ba kynthup ia i Lok bad ki khun jong u (L) Thomlin Suchiang kila ong ba kala pynlong ia ki ban leh kumne ka long na ka daw ba ka School Managing Committee (SMN) kala khot interview ia ki ar tylli ki Post Nonghikai ha kane ka skul khlem ka jingiamynjur lang da baroh ki SMC member.
Shuh shuh katkum ka jingiathuh jong kiba haïing la ong ba ia ka Sawlyngdoh Higher Secondary School Mowkaiaw la seng da (L) Thomlin Suchiang naduh ka snem 1970 bad la sdang ia ka ha ka snem 1971 bad ka skul ka la roi bad nang heh katba nangmih ki sngi. Kane ka skul kala lah ruh ban pynioh kam ia shibun ki briew ha ka kam Nonghikai bad kiwei de ki staff mynta la 50 snem. Ka skul kala ioh ruh ban rakhe ia ha Golden Jubilee ha ka 11.12.2021 kaba la iadon lang u Chief Minister, u Education Minister, u Urban Affairs bad ki wei ki wei ki kynrem ki lyndan lem bad ki paidbah nongshong shnong kane ka thaiñ.
La ong ba na ka liang jong u trai kane ka skul hapoh kine ki 50 snem lynter u la ialeh shitom miet bad sngi khlem da shongthait ban pynkiew ia kane a skul haduh ba u klet lut wat la ki khun ki kti, la ka ing ka sem bad u la long kum u nongkhrong ban leit pan jingiarap na kylleng ban ioh pynbiang ia ki jingdonkam ka skul.
Kaba pynsngewsih ia kiba haïing ka long bad ki khun jong u nongseng kim ioh lad ban rungkam ha kane ha skul ba la seng da u kpa jong ki. Ha kine ki ar snem ba la dep la don 2 ngut ki nonghikai ki ba shongthait bad ka SMC kala thmu ban pynlong ia ka Interview ha ka 29.7.2022.
Kumta na ka liang kiba haïing kiba dei ki khun jong u nongseng kila dep ban kyrpad ia ka SMC la bun sien ban sngewbha ban pynrung kam ia ka khun khatduh jong u nongseng ia kane ka skul ha kawei na kine ki post ba thylli. Ha katei ka por na ka liang jong ka SMC kala pyni ia ki daw ba ka khun jong u trai ka skul kam pat pyndep ia ka B.Ed.
Hynrei na ka liang jong kiba ha ïing kila pyntip ia ka SMC ba kane ka khun khatduh jong u (L) Thomlin Suchiang kan sa dep noh ia ka jingpule B.Ed jong ka hapoh shibnai. Pynban ka SMC ha ka jaka ban ap ia ka shibnai kala pynkloi pynban ban khot application noh ia kitei ki ar tylli ki post kiba kala ap mynta la ar snem.
Halor kane ka nongrim kiba haïing ki sngewdonhok ban ioh ia ka kam ha kane ka skul ba la seng da la u jong u kpa. Kata ruh tang na ka bynta ka khun khadduh jong u, nalor ba ka kmie jong ki, kala don ha ka jinglong tymmen.
Kumta kiba haïing ki buh ka jingkyrpad ia ki bor ba halor ba kin sngewbha lem ban tuklar halor kane ka kam, pynkut ka khubor ba la phah da ka kong Bliansibon Laloo kaba dei ka lok jong u (L) Thomlin Suchiang, ka Ridalin Laloo, ka khun khadduh bad u ma Pynbiang Laloo uba dei u dkhot ka SMC.