Ki nongialam jong ka Jaintia Coal Mine Dealer Association (JCMDA) ha ka 2 tarik u Ïaiong 2026 ki la pynskhem ba ka jingtih dewiong ka dang long ka lad kamai ba kongsan jong kiba bun ki briew ha ka thain, katba ki pynpaw ia ki jingeh kiba dang iai bteng ha kaba pynbeit ia ki jingeh kiba don sawdong jong kane ka bynta.Haba kren sha ki lad pathai khubor mynta ka sngi ha Shillong Press Club, u President barim ka JCMDA u Bah J.R. Pyrtuh u la pynpaw ba haduh mynta ym pat poi sha kano kano ka lad kaba skhem ha kaba iadei bad ka jingtih dewiong. U la kdew ka jingtih dewiong ha katei ka thain kan long kaba eh haduh katta katta, namar kan donkam ban tih haduh 100 meter ka jingjylliew shwa ban iaid shakhmat ban ioh tih dewiong.U Pyrtuh u la pynpaw ruh ia ki jingeh ha ka mariang, da kaba kdew ba ka jingpynduh ia ka khyndew ba la tih kan wanrah ia ka jingeh kaba khraw bad ka lah ban ktah jur ia ka mariang.U la pyntip shuh shuh ba haduh 80 percent ki nongshong shnong ki shaniah ha ka jingtih dewiong na ka bynta ka jingim jong ki. ka seng ka la rai ban pynlong ia ka jingiaid paidbah kaba jai jai ha ka 7 tarik u ïaiong 2026 ha East Jaintia Hills, da kaba kyntu ia ka sorkar ban wad ia ki lad ki lynti kiba lah ban weng ia ki jingeh ha kaba iadei bad ka jingtih dewiong, kynthup ia kiba iadei bad ka jingtih rat-hole mining. Ha kajuh ka por, u dkhot jong ka Planning committee u Sambormi Lyngdoh u la ong ba katba ka Supreme Court ka la ithuh ia ka hok jong ki trai ri trai muluk halor ka khyndew bad ki marpoh khyndew jong ka, ka jaka kaba kyrpang jong ka thain ka buh ia ki jingeh kiba lah ban pyntreikam ia ka jingtih dewiong kaba laitluid.U la ong ba kane ka jingthmu ban iaid paidbah ka thmu ban kyntu ia ka sorkar ban wanrah ia ki rukom tih kiba iadei bad ka jinglong jingman jong ka jaka ba kyrpang jong ka thain.Haba pynpaw ia ki jingeh ha ka liang ka khyndew, u Lyngdoh u la kdew ba ki jaka buh dewiong ha Jaintia Hills ki don ha ki jaka kiba jylliew bha, bunsien ki donkam ban tih da ki spah phut, katba ki jaka buh dewiong hi ki long kiba rit bha.