Ka khubor Pulit kaba la iohlum mynta ka sngi la iathuh ba ki Pulit jong ka East Jaiñtia ki dang bteng ia ka jingtalasi kali ha u surokbah NH-6 bad dei hynnin ka sngi ha ka por 5:30 baje janmiet kila ioh ban pynsangeh ia kawei ka kali Maruti S-Presso (tourist) ba don ia u Registration Number: ML 04 B 6638 bad na kane ka kali kila ioh ban kurup ia u drug Heroin bad ki dawai kuli beaiñ.
Ka khubor ka iathuh ba katei ka kali ka dei kaba wan na ki thaiñ Kalaiñ, Assam. Ki don baroh 7 ngut ki briew ba shong hapoh kane ka kali, ki Pulit ki la btah ia kitei ki briew ban hiar sha madan ban pynlong ia ka jingtalasi.
Ha ka jingtalasi ki Pulit kila ioh ia kawei ka beg plastic kaba la buhrieh hapoh ka seat jong u nongñiah (driver seat), haba la plied ia ka ki Pulit kila lap ia ka synduk sabon kaba don ia u kynja powder ba long rong sawbyrtem ia uba la suba ba u dei u drug heroin bad une u drug u khiah 9.9 grams. Nalor kane ka Pulit ki la lap ruh sa kawei ka plastic ba iong kaba don 24 strips ki dawai Nitrajepam tablet ba don 10 tylli ki tablet ha kawei ka strip bad kiba khia 2.4 grams. Ia u briew ba la suba donkti ha kane ka kam beaiñ ia uba la tip kyrteng kum u Jowel Dkhar 20 snem ka rta na ka shnong Moolamanoh, East Jaiñtia Hills District la kem noh da ki Pulit bad la register case pyrshah ia u ha Lumshnong Police Station.