Ka Pnar Student Movement (PSM) hynne ka sngi ka la aiti da ka jingthoh sha u Superintendent of Police, West Jaintia Hills District, da kaba dawa ban buh noh da ki Traffic Police ban peit bad pyniaid ia ka leit ka wan ki kali ha Lad Jowai Bypass.
Ka seing ka la ong ba la bun sien ki paidbah ki la ujor halor ka jingbun ki kali kiba iaid wrong side ha katei ka surok, kaba la pynlong ia katei ka jaka ban long kaba ma bad kaba ju jia bun ki aksiden. Ka jingbym don ki Traffic Police ban peitngor ka la buh jingma ia ki nongiaid lynti, ki nongniah kali bad ki paidbah baroh kiba pyndonkam ia katei ka surok.
Haba ki nongialam ka seng ki la leit ban iakynduh ia u Superintendent of Police, hynrei namar ka jingbym don jong u, ki la ioh ban iakynduh pynban ia ka Additional Superintendent of Police, ka kong C.W.Lyngdoh. Ha ka jingïakren bad katei ka ophisar, ka la pdiang ia ka jingdawa jong ka seing bad ka la kular ban iakren bad u Superintendent of Police bad ban phah ruh ban leit jurip ia katei ka jaka. Ka la ong ruh ba yn peit bniah ia ka jingdonkam ban pynbiang ia ki Traffic Sign, Road Sign bad Speed Breaker khnang ban lah ban pynduna bad tehlakam ia ki aksiden ha katei ka surok.
Ka Pnar Student Movement ka kyrpad ia ki bor ba dei peit ba kin shimkhia mardor halor kane ka mat khnang ban pynneh ia ka jingshngaiñ jong ki paidbah kiba pyndonkam ia Lad Jowai Bypass.
Kane ka long katkum ka kyrwoh na u Publicity Secretary ka Pnar Student Movement (PSM), u samla Khynrow S. Lakiang.
