Kawei ka jingjia tuh pisa na ka ATM ka la jia ha ka por kumba 2:24 mynstep, ha kaba ki CCTV ki la ïoh ring dur ïa ar ngut ki nongtuh kiba la tuh pisa na kawei ka ATM jong ka HDFC ha shnong Wapungskur, East Jaiñtia Hills District.
Ka kynhun tohkit crime scene ka la poi sha katei ka jaka ha ka por kumba 12:30 mynsngi, ha kaba ki pulit ki la pyndonkam ruh da ki ksew ban wad jingïarap ha kane ka jingtuh pisa na ATM. Kitei ki nongtuh ki la iehnoh ha katei ka jaka ba ki lute ïa ka gas cylinder bad ki tiar kiba la pyndonkam ban ot ïa ka ATM.
U Superintendent of Police ka East Jaiñtia Hills, u Pankaj Kumar Rasgania, ha ka 15 tarik u Ïaïong u la pyntip ba kumba T. 9,57,900 ki nongtuh kila ioh ban rong na katei ka ATM.
Kine ki nongtuh ki la tuh ruh shwa ïa kawei ka Bolero pickup, kaba ki la pyndonkam ban poi sha katei ka jaka, hynrei hadien ba ki la dep ia ka kam, ki la iehnoh ïa ka kali bad phet noh sha ki jaka bym lah ban tip. Haduh ba la thoh ia kane ka khubor ym pat ioh jingtip haka jingiadei bad kine ki nongtuh.
U trai jong ka Bolero u la ong ba u la thied ïa katei ka kali (bolero) kaba rim na uwei u paralok bad u la ñiah hi ïa ka ha ka 13 tarik u Ïaïong haduh kumba 5:30–6:00 janmiet, bad u la pynieng ïa ka ha shnong Dkhiah West kumba ju leh.
Hadien ba um ym iohi shuh ia ka kali na ka liang utei u trai ka Bolero u la ujor da ka FIR, une u trai jong katei ka kali katba dang wad ia ka sharum shaneng, ha ka por ba u dang don ha ka shnong Lumshnong, u la ioh jingtip ba ka don kawei ka kali ha Bolero ha Wapung kaba la shuh ieh sah, kumta u la leit sha kata ka jaka bad u la pynshisha ha ki pulit ba dei ka kali jong u, hynrei ym shym la shah ïa u ban shimti ïa ka namar ba ka don jingïadei bad ka jinglute ATM.
Ha kaba na ka liang utei u trai jong ka kali ruh u la ai ka jingïatreilang katba ka kynhun tohkit ka dang peit bniah ïa ka kali. Ki pulit ki la tan ïa ka kali sha Ladrymbai Police Outpost.
