U President ka VPP, East Jaiñtia Hills District u bah Damewanhi L. Rymbai u la ïakren bad ki lad pathai khubor mynta ka sngi ha ophis jong ka seng ha Dkhiah West, East Jaiñtia Hills District, ha kaba ïadei bad ki kam tih dewïong hapoh ka District.
U bah Rymbai u la ong ba u la iohi ia ki seng tih dewiong bad ki seng trei mon sngewbha ba ki pynbor ia ka sorkar ban plie biang ia ka jingtih dewiong ha kane ka District. Katto katne ki seng ki la pynlong wat ïa ki jingshah thngan khlem buh por ban pynbor ïa ka sorkar.
Wat hapdeng kine ki jingpyrshang, ki seng ki kyrmen ba ka sorkar kan pynhun ia ki jingdawa jong ki paidbah. U la ong ba ka jingkren dang shen jong u Deputy Chief Minister u bah Sniawbhalang Dhar ka la pynkyndit ia ka seng namar, haduh kine ki sngi, ka sorkar kam pat shim ia kino kino ki sienjam kiba skhem ban pynbeit ia ka kam tih dewiong.
U la kynnoh ba ka sorkar ka dang shaniah ha ka seng tih dewiong ban pynkhreh ia ka plan tih dewiong. U la buh jingkylli hato ki tnad Mining and Geology, ka (DMR), bad ki nongmihkhmat ba la jied kum ki MLA bad MDC kim don bynta ha ka rukom kaba thikna ban thaw ia ka plan ba la ialam da ka sorkar.
U Bah Rymbai u la ong ba kane ka jingeh kam dei tang ha East Jaiñtia Hills; Ka West Khasi Hills bad Garo Hills ki ïakynduh ïa kijuh ki jingeh, kumta ka jingjynjar ka jyllei ha kylleng ka jylla. U la ong ba ka jingkren jong u Deputy CM ka pyni ia ka jingshaniah palat ha ka seng tih dewiong ban pynkhreh ia ka plan. Ka seng ka kyrshan pura ia ka JCMDA (Jaintia Coal Miners and Dealers Association ), kaba la ai por lai bnai ia ka sorkar ban leh eiei. Kaba la pynkyndit ia ka seng, u la bynrap, ka dei ka jingtip ba ka JCMDA ka la pynlong ia ka jingialang ha kawei ka kompeni cement na ka bynta ka jingpyni kaba la thmu ban aiti sha ka sorkar. U la kylli hato ka kompeni cement ka dei ban iarap ia ka JCMDA ban pynkhreh ia ka plan tih dewiong. U la ong ba u don ki sakhi ba ka jingialang ka la jia, ioh lehse ki la thung ia ka kompeni cement kum ka consultant ne ka agency ban pynkhreh ia ka plan.
U bah Rymbai u la pynshai ba um pyrshah ban thaw ia ka plan tih dewiong lada ka jingthmu jong ka ka long ban plie biang ia ka jingtih dewiong ha ka District. Hynrei ka seng ka kwah ban tip balei u Deputy CM u pynbor ia ka seng tih dewiong ban thaw ia katei ka plan, bad mano u consultant ne ka agency kaba pynkhreh ia katei ka plan. U la buh jingkylli kaei ka ban jia lada ka plan kam pynpaw ia ki jaka ba shisha jong ka distrik; ka party ka donkam ban bishar bniah ia ka. Ka VPP ka la kyrshan ia ka JCMDA naduh kaba sdang bad ka la pan kopi ia ka plan khnang ba ka party kan lah ban bishar bniah bad rai la kan pdiang ne em ia ka.
Ka VPP ka dang ap hadien ka por ba la buh jong ka JCMDA kaba lai bnai. Lada ka sorkar kam lah ban shimkhia, ka VPP kan ym ai lad ia ki Company Cement ban treikam laitluid ha East Jaiñtia Hills. U la ong ba kam long kaba dei ba ki briew kiba nabar kin ioh jingmyntoi katba ki briew trai ri kim ioh ei ei; dei ban ailad ia ki briew trai ri ban ioh ia kajuh ka lad.
U la bynrap ruh ba lada ka sorkar ka kwah ban plie noh kloi ia ka jingtih dewiong, ka lah ban leh ha ka rukom kaba ju long.
U Rymbai u la kdew ba ki jingjia ha Thangskoo ha ka por ba lah dep ka dang don ha ka jingtohkit. Ar tylli ki agency ki dang tohkit ia ki jingjia kiba iadei bad ka jingtih dewiong, hynrei bun bnai ka lah iaid khlem kano kano ka jingmih na ki komiti tohkit. U la pynkut da kaba kyntu ia ki bor ba dei peit ba kim dei ban pynbor ia ki paidbah ban bitar.
