Ka Khasi Student Union (KSU) mynta ka sngi ka la aiti da ka Dorkhas sha baroh ki 36 ngut ki Nongmihkhmat Paidbah (MLA) ka Bri Hynniewtrep kum shibynta ban pynbor ia kine ki Nongmihkhmat ban kren bad pynsngew ia ki 5 tylli ki mat jingdawa kiba ka KSU ka la buh ha khmat ka Sorkar Jylla khamtam ba ka Dorbar Synrai jong ka Meghalaya Legislative Assembly kan sdang naduh ka 24 tarik mynta u Bnai.
Nalor ki 36 ngut ki MLA na Ri Lum Khasi yn pyrshang pynpoi ruh sha ki 24 ngut ki MLA ka Ri Lum Garo.
Kane ka jingleit aiti ia kine ki Dorkhas sha kitei ki nongmihkhmat la ia shim bynta da ki Dkhot na ki Unit bad Circle kiba hap ha ki Konstitwensi kaba ki MLA ki mihkhmat.
Ia ki MLA la jied da ki paidbah bad ka dei ka kamram jong ki ban kren ia ki mat ki jura kiba ktah ia ka lad ioh kam ioh jam bad ia ki jingeh jong ka Jaitbynriew ruh baroh kawei. Kumta ka seng ka ieh ha ka jingstad jong ki Nongmihkhmat ia ka kamram kaba ki dei ban leh.
Ka Seng kan ym shong kli kti ban iakhih ia kitei ki mat jingdawa katba ka sorkar Jylla kam pat lah ban pyntreikam pura ia ki jingangnud kiba ka seng ka la buh ha khmat ka Sorkar.
Kumta ka Seng da kawei ka jingmut ka la rai ban pynlong ia ka Sit in demonstration lane ka jingshong kyllain̈ Myngnggor ha 24 tarik mynta u bnai ha u Mot dur ba shi rynn̈ieng jong u Woh Kiang Nangbah mar pyrshah bad ka Shillong Civil Hospital naduh ka por 11 baje mynstep. Bad ha ka sngi ba bud pat kata ka 25 tarik yn pynlong ia ka Sit in Demonstration sa ha ki 7 tylli ki District jong ka Bri 7 Trep.
Ha kaba ia dei bad lashai ka sngi ka 22 tarik ka Seng kan ym buh ia kino kino ki prokram jingiakhih khnang ba kan ym pynwit ia ki Samla ki ban ia khun ia ka Eksam LDA ba la pyniaid da ka MPSC.
